ភ្នាក់ងារទិញដូរកីឡាករបាល់ទាត់លោក Vincenzo Morabito សញ្ជាតិអុីតាលីបានឲ្យដឹងថា ក្រុម Borussia Dortmund របស់អាល្លឺម៉ង់បានបដិសេធសំណើទិញកីឡាករ ខ្សែប្រយុទ្ធ Pierre-Emerick Aubameyang ក្នុងតម្លៃ៨០លានផោនពីក្លិបកាំភ្លើងធំ Arsenal ។
ខ្សែប្រយុទ្ធអន្តរជាតិហ្គាបង់នេះស៊ុតបាល់បាន៣៨គ្រាប់ក្នុងរដូវកាលចាស់ហើយមានព័ត៌មានថាគាត់អាចនឹងចាកចេញពីក្លិបនៅក្នុងប្រទេសអាល្លឺម៉ង់ដោយមានក្លិបធំៗ ជាច្រើនចាប់អារម្មណ៍ដូចជាក្លិប Real Madrid ជាដើម ។
ក្លិប Napoli ក៏ចង់បាន Aubameyang ផងដែរ ក្រោយលក់ខ្សែប្រយុទ្ធអន្តរជាតិ អាហ្សង់ទីន Gonzalo Higuain ទៅឲ្យក្រុម សេះបង្កង់ Juventus ក្នុងតម្លៃ៧៦លាន ផោន ។
លោក Vincenzo Morabito បាននិយាយ ប្រាប់វិទ្យុអុីតាលី CRC ថា “ខ្ញុំធ្លាប់បានទៅ ចរចាទិញកីឡាករ Aubameyang ឲ្យក្លិប Napoli ហើយអ្វីដែលខ្ញុំដឹងនោះគឺក្លិប Arsenal ហ៊ានផ្តល់លុយ៨០លានផោន ដើម្បីទិញ Aubameyang តែក្លិប Borussia Dortmund បានបដិសេធ”៕
ដោយ៖ ដេវីត