Asahi Group ដែលជាក្រុមហ៊ុនស្រាបៀរដ៏ធំបំផុតរបស់ប្រទេសជប៉ុន ត្រូវបានគេរាយការណ៍ថានៅសល់តែប៉ុន្មានថ្ងៃទៀតប៉ុណ្ណោះនឹងដាច់ស្តុកស្រាបៀរដ៏ពេញនិយមបំផុតរបស់ខ្លួន ដោយសារតែការវាយប្រហារតាមអ៊ីនធឺណិត(cyber-attack)ដែលបណ្តាលឱ្យមានការដាច់ប្រព័ន្ធផលិត។

ការវាយប្រហារដែលត្រូវបានរាយការណ៍កាលពីថ្ងៃចន្ទបានបង្ខំឱ្យក្រុមហ៊ុនបញ្ឈប់ការផលិតនៅរោងចក្រភាគច្រើនចំនួន 30ទីតាំង របស់ខ្លួននៅទូទាំងប្រទេស រួមទាំងរោងចក្រដែលផលិតវានូវស្លាកសញ្ញាយីហោ Asahi Super Dry ផងដែរ។

ក្រុមហ៊ុនដែលផលិតស្រាវីស្គី Nikka និងភេសជ្ជៈមានជាតិអាល់កុល និងភេសជ្ជៈជាច្រើនប្រភេទផងដែរនោះ មិនបានប្រាប់ថានៅពេលណាដែលពួកគេអាចដំណើរការឡើងវិញបានឡើយ ដែលបង្កឱ្យមានការជូនដំណឹងក្នុងចំណោមអ្នកលក់ដុំ និងអ្នកលក់រាយ។

កាសែត Financial Times បានអះអាងនៅក្នុងរបាយការណ៍មួយកាលពីថ្ងៃព្រហស្បតិ៍ថា ការបិទរោងចក្រផលិតស្រាបៀរក្នុងស្រុករបស់ Asahi មានន័យថា វាអាចអស់ស្តុកនៃ Super Dry របស់ខ្លួនក្នុងរយៈពេលពីរឬបីថ្ងៃខាងមុខ។

អ្នកនាំពាក្យម្នាក់ដែលសុំមិនបញ្ចេញឈ្មោះបានប្រាប់ទីភ្នាក់ងារព័ត៌មានបារាំងកាលពីថ្ងៃសុក្រថា “មិនទាន់មានការស្ដារប្រព័ន្ធរបស់យើងឡើងវិញភ្លាមៗទេនៅពេលនេះ។ “ការនាំចេញធម្មតានៅតែផ្អាក។ ផលិតកម្មមិនត្រូវបានប៉ះពាល់ដោយផ្ទាល់ [ដោយបញ្ហាប្រព័ន្ធ] ប៉ុន្តែវាត្រូវបានបញ្ឈប់ដោយសារតែការដឹកជញ្ជូនត្រូវបានផ្អាក”។

Super Dry គឺជាសារបៀពេញនិយមរបស់ប្រទេសជប៉ុន ដោយស្រាបៀនេះ 73 លានកេសត្រូវបានលក់កាលពីឆ្នាំមុន ចំពេលមានការធ្លាក់ចុះនៃការផឹកស្រាបៀរក្នុងស្រុក និងការប្រកួតប្រជែងខ្លាំងរវាង Asahi, Kirin, Sapporo និង Suntory ដើម្បីដាក់លក់ផលិតផលថ្មីដែលផ្តោតលើអ្នកផឹកវ័យក្មេង៕