ខេត្តពោធិ៍សាត់ ៖ ស្រ្តីវ័យចំណាស់ម្នាក់ត្រូវបានសមត្ថកិច្ច២ខេត្ត សហការស្រាវជ្រាវ និងបង្រ្កាបទាន់ពេលវេលា ក្នុងនោះក៍គេរកឃើញវត្ថុតាងសង្ស័យសារធាតុញៀន និងធ្វើការដកហូតផងដែរ នេះបើតាមការបញ្ជាក់ពីមន្រ្តីក្នុងលក្ខ័ណសុំមិនបញ្ចេញឈ្មោះ នាព្រឹកថ្ងៃសៅរ៍ ១២កើត ខែអស្សុជ ឆ្នាំម្សាញ់ សប្គស័ក ព.ស ២៥៦៩ ត្រូវនឹងថ្ងៃទី៤ ខែតុលា ឆ្នាំ២០២៥ នេះ ។
ប្រភពដដែលឲ្យដឹងទៀតថា ករណីបង្រ្កាបជនសង្ស័យរក្សាទុក ចែកចាយ សង្ស័យសារធាតុញៀនខាងលើ ធ្វើឡើងត្រង់ចំណុចផ្ទះស្រ្តីម្នាក់ឈ្មោះ កង ដា អាយុ ៦១ឆ្នាំ ជនជាតិខ្មែរ មុខរបរ កសិករ ស្ថិតនៅភូមិកណ្ដាល ឃុំអន្លង់រាប ស្រុកវាលវែង ខេត្តពោធិ៍សាត់ ។
ប្រភពបញ្ជាក់ទៀតថា ករណីខាងលើកម្លាំងការិយាល័យជំនាញប្រឆាំងគ្រឿងញៀនខេត្តកោះកុង សហការជាមួយកម្លាំងសមត្ថកិច្ចស្រុកវាលវែង ធ្វើការឡោមព័ទ្ធ និងឆេកឆេផ្ទះស្រីសង្ស័យ(កង ដា)និងកន្លែងផ្សេងៗក្បែរនោះ ទើបគេរកឃើញម្សៅក្រាមពណ៏សថ្លា សង្ស័យជាសារធាតុញៀន ដែលគេច្រកក្នុងថង់ប្លាស់ស្ទិច ភ្ជួរនៅនឹងធ្នឹមទ្រុងជ្រូកក្បែរផ្ទះ ។
ប្រភពបញ្ជាក់បន្ថែមថា ម្សៅក្រាមពណ៏សថ្លាសង្ស័យសារធាតុញៀន១ស្បោងធំនេះ មានទម្ងន់ប្រមាណ(600G)បច្ចប្បន្ន ជនសង្ស័យ(កង ដា)រួមទាំងវត្ថុតាង ប្រគល់ទទួលជូនមន្រ្តីជំនាញប្រឆាំងគ្រឿងញៀន ខេត្តកោះកុង ចាត់ការបន្ត ៕
ដោយៈ ប៉ឹម ពិន
