ខេត្តកណ្ដាល ៖ មនុស្សពីរនាក់បានបាត់ខ្លួន បន្ទាប់ពីពួកគាត់រាយសន្ទូចរកត្រី ហើយជួបភ្លៀងខ្យល់មួយមេធំ កាលពីយប់ថ្ងៃទី២៣ ខែតុលា ឆ្នាំ២០២៥ នៅព្រឹកថ្ងៃទី២៤ ខែតុលា ឆ្នាំ២០២៥ ។ អាជ្ញាធរខេត្តកណ្ដាល និងអាជ្ញាធរស្រុកស្អាង កងកម្លាំងទាំងបី ប្រជាការពារភូមិ សាច់ញាតិជនរងគ្រោះ និងប្រជាពលរដ្ឋចុះស្វែងរកជនរងគ្រោះទាំងពីរនាក់ ស្ថិតនៅភូមិត្នោតញី ឃុំខ្ពប ស្រុកស្អាង ខេត្តកណ្ដាល ។ នេះបើយោងតាមផេករដ្ឋបាលខេត្តកណ្តាល បានប្រកាសនាម៉ោង៥ ល្ងាចថ្ងៃទី២៤ ខែតុលានេះ ។
តាមរបាយការណ៍របស់អាជ្ញាធរស្រុកស្អាង បានឱ្យដឹងថា កាលពីយប់ថ្ងៃទី២៣ ខែតុលា ឆ្នាំ២០២៥ មានករណីមនុស្សប្រុស០២នាក់ ត្រូវជាពូ និងក្មួយ បានទៅរាយសន្ទូចនៅខាងក្រោយភូមិត្នោតញីត្រូវខ្យល់ភ្លៀងមួយមេធំកួចលិចទូក បណ្ដាលឱ្យបាត់ខ្លួនមកដល់ព្រឹកនេះ ពុំទាន់រកឃើញនៅឡើយ។ ជនរងគ្រោះដែលបានបាត់ខ្លួនមានឈ្មោះ ៖
១/ឈ្មោះ ឡា មាស ភេទ ប្រុស អាយុ ១៨ឆ្នាំ និង ២/ឈ្មោះ ឡាត់ ឌីណា ភេទ ប្រុស អាយុ១០ឆ្នាំ រស់នៅក្នុងភូមិត្នោតញី ឃុំខ្ពប ស្រុកស្អាង ខេត្តកណ្ដាល។
សូមបញ្ជាក់ថា គិតត្រឹមល្ងាចថ្ងៃទី២៤នេះ ក្រុមការងារមិនទាន់បានរកឃើញជនរងគ្រោះនៅឡើយទេ ហើយនៅតែបន្តស្វែងជនរងគ្រោះដែលបានបាត់ខ្លួន ដោយក្នុងនោះក្រុមការងារបានរកឃើញទូករបស់ជនរងគ្រោះ ដែលបានលិចនៅក្នុងទឹក ព្រមទាំងបានសន្និដ្ឋានថា ជនរងគ្រោះទាំងពីរនាក់អាចលង់ទឹកនៅទីនោះផងដែរ ៕
