ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី០៤ ខែវិច្ឆិកា ឆ្នាំ២០២៥នេះ បានឱ្យដឹងថា កម្លាំងនគរបាលស្រុកបាណន់ បានចុះស្រាវជ្រាវ និងឃាត់ខ្លួនមនុស្សចំនួន ៤នាក់ ខណៈពួកគេកំពុងធ្វើសកម្មភាពប្រើប្រាស់ឧបករណ៍ឆក់ត្រីយ៉ាងសកម្មក្នុងមូលដ្ឋាន ប៉ុន្តែពេលឃាត់ខ្លួនឆែកឆេរ ស្រាប់តែឃើញមានគ្រឿងញៀនជាប់ជាមួយទៀតផង។
ប្រភពដដែលបន្តថា ជាក់ស្ដែងកាលពីថ្ងៃទី០៣ ខែវិច្ឆិកា ឆ្នាំ២០២៥ លោកវរសេនីយ៍ទោ ហេង បារាំង អធិការនគរបាលស្រុកបាណន់ បានដឹកនាំល្បាតក្នុងមូលដ្ឋានឃុំចែងមានជ័យនិងឃុំតាគ្រាម ស្រុកបាណន់ ខេត្តបាត់ដំបង ក៏ប្រទះឃើញ បុរសចំនួន ០៤នាក់ ដែលប្រដាប់ដោយឧបករណ៍ឆក់ត្រីខុសច្បាប់កំពុងប្រព្រឹត្តិសកម្មភាពឆក់ត្រីក្នុងមូលដ្ឋាននេះដោយមិនខ្វល់ពីការហាមឃាត់របស់ច្បាប់ ។
សមត្ថកិច្ចបានធ្វើការឃាត់ខ្លួនភ្លាមៗ ក៏ពិនិត្យឃើញមានគ្រឿងញៀននៅជាប់នឹងខ្លួនពួកគាត់ផង ដោយសមត្ថកិច្ចដកហូតបាន៖
-អំភ្លីឆក់ចំនួន០៣គ្រឿង
-អាគុយ៤០អំពែចំនួន០៣
– ដងឆក់ចំនួន០២សម្រាប់
-សារធាតុញៀនចំនួន០១ថង់
-សម្ភារៈពាក់ព័ន្ធសម្រាប់ប្រើប្រាស់គ្រឿងញៀនមួយចំនួន
-ទូរស័ព្ទដៃចំនួន០១គ្រឿង (ចាស់)។
សមត្ថកិច្ចនគរបាលស្រុកបាណន់បានឱ្យដឹងថាពេលសាកសួរ ពួកគាត់ទាំង០៤នាក់នេះ ប្រព្រឹត្តិការប្រើប្រាស់គ្រឿងញៀន ផងនិងប្រព្រឹត្តិអំពើល្មើសច្បាប់ប្រើឧបករណ៍ឆក់ត្រី ក្នុងមូលដ្ឋានយ៉ាងសកម្មផង នាពេលកន្លងមក និងបច្ចុប្បន្ន។
សូមជម្រាបជូនថាករណីប្រើប្រាស់ឧបករណ៍ឆក់ត្រីនៅមូលដ្ឋាន ទាំងពេលកន្លងមក និងពេលបច្ចុប្បន្ន នៅតែមានសកម្មភាពល្មើស ច្បាប់ជាបន្តបន្ទាប់ បើទោះបីសមត្ថកិច្ចចាត់វិធានការបំផុស ផ្សព្វផ្សាយឱ្យពួកគាត់ភ្ញាក់រលឹកស្វែងយល់ពីសកម្មភាពល្មើសច្បាប់យ៉ាងណាក៏ដោយ តែពួកគាត់មួយចំនួនតូច នៅតែបន្តសកម្មភាព នេះឥតឈប់ ។
បើមើលពីរូបភាពខាងក្រៅ ហាក់ឃើញថាជារឿងតូចតាចណាស់ ប៉ុន្តែឧបករណ៍ឆក់នេះ វាបានបំផ្លាញទាំងត្រី តូច ត្រីធំ ត្រី ពង កូនរាល់ ថ្ងៃនៅមូលដ្ឋានខ្លះដែលធ្វើឱ្យបាត់បង់ អន្តរាយដល់ការបង្កកំណើត ចាំបាច់ពួកគាត់គប្បីចូល រួមទាំងអស់គ្នា ដោយប្រើប្រាស់តែឧបករណ៍នេសាទណាដែលត្រឹមត្រូវតាមច្បាប់នោះបានហើយ ។
ជនសង័្សយទាំង០៤នាក់និងឧបករណ៍សម្ភារៈល្មើសច្បាប់នគរបាលស្រុករៀបចំបញ្ជូនមកការិយាល័យជំនាញនៅស្នងការដ្ឋានដើម្បីអនុវត្តទោសទៅតាមផ្លូវច្បាប់៕ដោយ៖តារា
