ភ្នំពេញ៖ ក្រសួងទេសចរណ៍ នៅព្រឹកថ្ងៃទី១៨ ខែវិច្ឆិកា ឆ្នាំ២០២៥នេះ បានឱ្យដឹងថា លោក ហួត ហាក់ រដ្ឋមន្ត្រីក្រសួងទេសចរណ៍ អញ្ជើញជាអធិបតីក្នុងពិធីសន្និសីទសារព័ត៌មាន នៃការនិពន្ធដំឡើងស្មាដៃថ្មីរបាំ “អប្សរាយសោធរបុរៈចក្រភពអង្គរ” ជាស្នាដៃរបាំបុរាណ Original ដែលត្រូវបានផ្តួចផ្តើមផលិតឡើងដោយក្រុម អប្សរា២៥ដួង ដែលជាក្រុមទទួលបានជ័យលាភីឆ្នើមកិត្តិយសថ្នាក់ខ្ពស់ពី សម្តេចអគ្គមហាសេនាបតីតេជោ ហ៊ុន សែន នៅក្នុងមហោស្រពសិល្បៈយុវជនទូទាំងប្រទេស អបអរទិវាវប្បធម៌ជាតិ ៣មីនា លើកទី២៣ កាលពីឆ្នាំ២០២០។
ក្នុងពិធីដ៏អធិកអធមនេះ បានធ្វើឡើងនៅសណ្ឋាគារហ៊ីម៉ាវ៉ារី កាលពីល្ងាចថ្ងៃទី១៦ ខែវិច្ឆិកាថ្មីៗនេះ មានការអញ្ជើញចូលរួមពីលោកស្រី កុយ ពិសី រដ្ឋមន្ត្រីប្រតិភូអមនាយករដ្ឋមន្ត្រី លោក លោកស្រី រដ្ឋលេខាធិការ អនុរដ្ឋលេខាធិការ និងលោក លោកស្រី នាងកញ្ញាជាភ្ញៀវកិត្តិយសយ៉ាងច្រើនកុះករ។
ក្នុងឱកាសនៃពិធី លោករដ្ឋមន្ត្រី ជម្រាបជូនថា ស្នាដៃរបាំ “អប្សរាយសោធរបុរៈចក្រភពអង្គរ” នេះ គឺដើម្បីបញ្រ្ជាប និងរួមគ្នាថែរក្សាអភិរក្សសិល្បៈវប្បធម៌ខ្មែរនាសម័យមហានគរ និងផ្តល់តម្លៃ ព្រមទាំងលើកតម្កើងកិត្យានុភាពនៃវប្បធម៌ខ្មែរ ដែលល្បីរន្ទឺពីរាជធានីយសោធរបុរៈចក្រភពអង្គរ និងប្រភពនៃទេវស្ត្រីសួគ៌ ឬ«អប្សរា» ផងដែរ៕
ដោយ៖តារា
