ប្រទេសអុីតាលីបន្តកត់ត្រាការសម្លាប់ស្ត្រីជាច្រើន ក្នុងបរិបទដែលនាយករដ្ឋមន្ត្រី Giorgia Meloni ត្រូវបានរិះគន់ថាមិនបានធ្វើគ្រប់គ្រាន់ដើម្បីទប់ស្កាត់អំពើហិង្សាលើយេនឌ័រ។

ប្រទេសអុីតាលីកំពុងប្រឈមមុខនឹងការកើនឡើងនៃការសម្លាប់ស្ត្រី ដោយករណីចុងក្រោយបំផុតគឺការស្លាប់របស់តារាម៉ូដែល Pamela Genini នៅពាក់កណ្តាលខែតុលា។ យោងតាមទីភ្នាក់ងារស៊ើបអង្កេត នាងត្រូវបានវាយប្រហារដោយអតីតមិត្តប្រុសរបស់នាង Gianluca Soncin នៅអាផាតមិនរបស់នាងនៅទីក្រុង Milan។ ប៉ូលិសបានមកដល់កន្លែងកើតហេតុ ហើយបានរកឃើញថា Genini ស្លាប់ ខណៈដែល Soncin កំពុងជាប់ឃុំឃាំង និងកំពុងរង់ចាំការចោទប្រកាន់ពីបទឃាតកម្ម ភាពឃោរឃៅ ការតាមដាន និងឃាតកម្មគិតទុកជាមុន។
យោងតាមអង្គការ Non Una Di បញ្ជាក់ថា Meno Genini គឺជាជនរងគ្រោះទី 72 នៃការសម្លាប់ស្ត្រីនៅក្នុងប្រទេសអុីតាលីក្នុងឆ្នាំ 2025។ ចាប់តាំងពីពេលនោះមក ស្ត្រីបួននាក់ទៀតត្រូវបានសម្លាប់ និងប្រាំមួយករណីត្រូវបានចាត់ទុកថាជាការសម្លាប់ស្ត្រី។ នៅឆ្នាំ 2024 ប្រទេសអុីតាលីបានកត់ត្រាករណីចំនួន 116 ដែលធ្លាក់ចុះបន្តិចពីពីរឆ្នាំមុន។
លោកស្រីនាយករដ្ឋមន្ត្រី Giorgia Meloni ដែលបានឡើងកាន់តំណែងកាលពីបីឆ្នាំមុន និងជានាយករដ្ឋមន្ត្រីស្ត្រីដំបូងរបស់ប្រទេសអុីតាលី កំពុងស្ថិតនៅក្រោមសម្ពាធចំពោះការបរាជ័យក្នុងការដោះស្រាយអំពើហិង្សាផ្អែកលើយេនឌ័រ និងវិសមភាពនៅក្នុងទីផ្សារការងារ។ តួលេខបង្ហាញថា អត្រាកំណើតនៅតែបន្តធ្លាក់ចុះ ខណៈដែលស្ត្រីមួយចំនួននៅក្នុងប្រទេសអុីតាលីនៅតែរកបានតិចជាងបុរសរហូតដល់ ៤០%។
រដ្ឋាភិបាលរបស់លោកស្រី Meloni បានដាក់ចេញច្បាប់ប្រឆាំងការតាមដាន និងការផ្តន្ទាទោសដ៏តឹងរ៉ឹងចំពោះឧក្រិដ្ឋកម្មអំពើហិង្សាក្នុងគ្រួសារ។ ទោះជាយ៉ាងណាក៏ដោយ ក្រុមសកម្មជននិយាយថា វិធានការបង្ការមិនបានដូចការរំពឹងទុកទេ។ កាលពីសប្តាហ៍មុន ក្រសួងអប់រំរបស់ប្រទេសអុីតាលីបានស្នើឱ្យរក្សាការហាមឃាត់ការអប់រំផ្លូវភេទនៅក្នុងសាលាមធ្យមសិក្សា ទោះបីជាកម្មវិធីនេះត្រូវបានគេមើលឃើញថាជាផ្នែកសំខាន់មួយនៃការបង្កើនការយល់ដឹងអំពីអំពើហិង្សាផ្អែកលើយេនឌ័រក៏ដោយ។
ទន្ទឹមនឹងនេះ គណបក្សប្រឆាំងបាននិយាយថា ការហាមឃាត់នេះនឹងធ្វើឱ្យប្រទេសនេះយឺតយ៉ាវនៅពីក្រោយអឺរ៉ុប។ សមាជិកសភាប្រឆាំងម្នាក់បាននិយាយថា ការរឹតបន្តឹងនេះនឹងធ្វើឱ្យប្រទេសអុីតាលីជាប់គាំងនៅក្នុងផ្នត់គំនិតបុរសាធិបតេយ្យ។ ការិយាល័យរបស់នាយករដ្ឋមន្ត្រី Meloni បានបដិសេធមិនធ្វើអត្ថាធិប្បាយទេ ប៉ុន្តែលោកស្រីធ្លាប់បានបដិសេធការចោទប្រកាន់ថាលោកស្រីប្រឆាំងនឹងស្ត្រី ដោយនិយាយថាគោលនយោបាយគ្រួសារនៅតែជាអាទិភាពសម្រាប់រដ្ឋាភិបាល៕ ដោយធីរីណា

រូប​ថត​: Getty Images