ខេត្តបន្ទាយមានជ័យៈ ឃ្លាំងស្តុបទុកសាច់បង្កកចំនួនពីរកន្លែង ស្ថិតនៅភូមិបាលិលេយ្យ២ និងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ត្រូវអាជ្ញាធរខេត្តចុះពិនិត្យមើលគុណភាព។
លោក ឃ្លោក នួយ អភិបាលរងខេត្តតំណាងឲ្យឯកឧត្តម អ៊ុំ រាត្រី អភិបាល នៃគណៈអភិបាលខេត្ត បានដឹកនាំក្រុមការងារចម្រុះ និងអាជ្ញាធរមូលដ្ឋាន ចុះពិនិត្យមើលឃ្លាំង ២កន្លែងដែលបានស្តុបទុកសាច់បង្កក ស្ថិតនៅភូមិបាលិលេយ្យ២ និងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត នាថ្ងៃទី២៦ ខែវិច្ឆិកា ឆ្នាំ២០២៥។ ជាពិសេស មន្ត្រីជំនាញបានដកហូតយកសាច់បង្កកចំនួន ៦ប្រភេទដូចជា ទាមូល ចុងស្លាបមាន់ គល់ស្លាប់មាន់ (ទាំងមូល) ស្លាប់កណ្ដាល ភ្លៅមាន់ និងប្រហិតសាច់ជ្រូក យកទៅពិសោធន៍សំណាក់រកសារធាតុគីមី ដើម្បីឲ្យដឹងថាសាច់នោះមានគុណភាពល្អទៅតាមស្តង់ដាបច្ចេកទេស ឬមិនមានគុណភាព។
នាឱកាសនោះលោក ឃ្លោក នួយ អភិបាលរងខេត្តបន្ទាយមានជ័យ បានលើកឡើងថា ដើម្បីទប់ស្កាត់បទល្មើសតាមបន្ទាត់ព្រំដែន សូមឱ្យកងកម្លាំងឬស្ថាប័នដែលមានការពាក់ព័ន្ធ ជួយសហការបង្ក្រាបបទល្មើសតាមព្រំដែនឲ្យខានតែបាន ដោយសង្កេតឃើញថាសព្វថ្ងៃនេះឈ្មួញតែងតែនាំឥវ៉ាន់គេចពន្ធតាមច្រករបៀងជាច្រើន តាមបណ្ដោយបន្ទាត់ព្រំដែន ដែលមានក្រុង-ស្រុកចំនួន ៥ នៅក្នុងខេត្ត។
លោកបានបន្តទៀតថា ការទប់ស្កាត់សាច់បង្កកដែលដាក់លក់តាមទីផ្សារអាចប្រឈមនិងជំងឺជាច្រើនដែលយើងមិនបានទប់ស្កាត់ និងពិនិត្យមើលឲ្យបានច្បាស់លាស់ ដោយសារតែមានជនខិលខូចតែងតែនាំផលិតផលលួចចូលតាមច្រករបៀងជាហូរហែ ដែលអាចបង្ករធ្វើឲ្យប៉ះពាល់ដល់សុខភាពបងប្អូនប្រជាពលរដ្ឋដែលកំពុងតែបរិភោគជាប្រចាំថ្ងៃ។
គួរបញ្ជាក់ផងដែរថា ការដកហូតគ្រឿងបង្កកចំនួន ២៨០គីឡូក្រាម ដោយពិនិត្យឃើញថាមានក្លិនស្អុយ នឹងខូចគុណភាព សាច់ទាំងអស់នេះក៏បានបញ្ជូនយកទៅដុតកំទេចចោល ដោយមានការចូលរួមពីរមន្ទីរអង្គភាព អាជ្ញាធរមូលដ្ឋាន និងមន្ត្រីជំនាញផងដែរ៕
ដោយ៖ វណ្ណា
