ខេត្តកំពង់ឆ្នាំង ៖ មន្ត្រីខណ្ឌរដ្ឋបាលជលផល នៃមន្ទីរកសិកម្មុ រុក្ខាប្រមាញ់ និងនេសាទខេត្តកំពង់ឆ្នាំង នៅល្ងាចថ្ងៃទី២៨ ខែវិច្ឆិកា ឆ្នាំ២០២៥ ឃាត់ជនសង្ស័យ២នាក់ ពីបទល្មើសនេសាទដោយប្រើឧបករណ៍ឆក់ត្រី នៅចំណុចភូមិត្របែក ឃុំត្រងិល ស្រុកកំពង់លែង ។
លោក លី ឡា នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំងឲ្យដឹងថា កម្លាំងខណ្ឌរដ្ឋបាលជលផល បានសហការជាមួយនិងផ្នែករដ្ឋបាលជលផលផ្សារឆ្នាំង សង្កាត់រដ្ឋបាលកំពង់លែង បានសហការជាមួយកម្លាំងអធិការដ្ឋាននគរបាលស្រុកកំពង់លែង បានចុះចាប់ឃាត់ជន សង្ស័យ២នាក់ ដែលកំពុងធ្វើសកម្មភាពឆក់ត្រី ក្នុងបឹង ក្នុងភូមិត្របែក ឃុំត្រងិល ស្រុកកំពង់លែង ។
ការចាប់ឃាត់ជនសង្ស័យទាំង២នាក់ បានដករហូតវត្ថុតាង មាន ៖ ឧបករណ៍ឆក់ត្រី១គ្រឿង ដងឆក់ត្រី១គូ អាគុយ៤០អំពែ ១គ្រឿង ខ្សែភ្លើងប្រវែង ៣ម៉ែត្រ ទូកបាឡាស្មាច់ ភ្ជាប់ម៉ាស៊ីន១គ្រឿង និងត្រីទម្ងន់២គីឡូក្រាម ។
ជនសង្ស័យទាំង២នាក់មាន ៖ ១.ឈ្មោះ អឿន ទិត្យ ភេទប្រុស អាយុ ២១ ឆ្នាំ និង២.ឈ្មោះ អឿន កំសាន្តភេទប្រុស អាយុ ១៩ ឆ្នាំ ទាំង២នាក់រស់នៅភូមិសំរោង ឃុំពោធិ៍ស្រុកកំពង់លែង ។
ជនសង្ស័យខាងលើត្រូវបានមន្ត្រីជំនាញជលផលកសាងសំណុំរឿងបញ្ជូនទៅតុលាការ ដើម្បីចាត់ការតាមផ្លូវច្បាប់ ៕
