សហព័ន្ធកីឡាបាល់ទាត់អ៊ីរ៉ង់បាននិយាយកាលពីថ្ងៃសុក្រថា ប្រទេសអ៊ីរ៉ង់នឹងធ្វើពហិការមិនចូលរួមការចាប់ឆ្នោតសម្រាប់ការប្រកួតបាល់ទាត់ពិភពលោកឆ្នាំ 2026 នៅសហរដ្ឋអាមេរិកនៅសប្តាហ៍ក្រោយ ដើម្បីតវ៉ាចំពោះការបែងចែកទិដ្ឋាការមានកំណត់។ អ្នកនាំពាក្យសហព័ន្ធលោក Amir Mehdi Alavi ត្រូវបានដកស្រង់សម្តីដោយគេហទំព័រព័ត៌មានកីឡាអ៊ីរ៉ង់ Tarafdari ថា “គណៈប្រតិភូអ៊ីរ៉ង់នឹងមិនមានវត្តមានសម្រាប់ការចាប់ឆ្នោត World Cup ទាក់ទងនឹងស្ថានភាពចុងក្រោយនៃការចេញទិដ្ឋាការសម្រាប់គណៈប្រតិភូអ៊ីរ៉ង់ដើម្បីចូលរួមក្នុងពិធីចាប់ឆ្នោតនោះទេ” ។

សហរដ្ឋអាមេរិកបានដាក់កំហិតទិដ្ឋាការយ៉ាងតឹងរឹងជាយូរណាស់មកហើយលើជនជាតិអ៊ីរ៉ង់ ដោយសារហេតុផលនយោបាយ និងសន្តិសុខ។

លោក Alavi ត្រូវបានដកស្រង់សម្តីដោយនិយាយថា សហរដ្ឋអាមេរិកបានផ្តល់ទិដ្ឋាការដល់សមាជិកគណៈប្រតិភូអ៊ីរ៉ង់ចំនួន ៤ នាក់ រួមទាំងគ្រូបង្វឹក Amir Ghalenoei ប៉ុន្តែមិនបានផ្តល់ទិដ្ឋាការដល់លោក Mehdi Taj ប្រធានសហព័ន្ធបាល់ទាត់អ៊ីរ៉ង់ទេ។

អ៊ីរ៉ង់បានជាប់វគ្គជម្រុះ World Cup ក្នុងខែមីនា បន្ទាប់ពីស្មើ 2-2 ជាមួយ អ៊ូសបេគីស្ថាន ក្នុងទីក្រុង Tehran ដោយពួកគេនឹងបង្ហាញខ្លួនជាលើកទី 7 នៅក្នុងការប្រកួតបាល់ទាត់ពិភពលោក និងជាលើកទី 4 ជាប់ៗគ្នា៕