ខេត្តកំពង់ស្ពឺ ៖ មន្ត្រីជាន់ខ្ពស់ក្រសួងសាធារណការនិងដឹកជញ្ជូនឲ្យដឹងនៅព្រឹកថ្ងៃទី២៩ ខែវិច្ឆិកា ឆ្នាំ២០២៥ នេះថា ថ្ងៃទី២៨ ខែវិច្ឆិកា ឆ្នាំ២០២៥ ក្រុមការងារត្រួត ពិនិត្យចល័តរបស់ក្រសួង ដឹដឹកនាំដោយលោកសេង ឈួន រដ្ឋលេខាធិការ និងជាប្រធានក្រុមការងារត្រួត ពិនិត្យយានយន្តចល័ត សហការជាមួយស្ថានីយជញ្ជីងអចល័ត កណ្តោលដុំ ព្រមទាំងកងកម្លាំងសមត្ថកិច្ចពាក់ព័ន្ធ ចុះប្រតិបត្តិការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅលេីផ្លូវជាតិលេខ៤៤ គ.ម លេខ៣+៥០០ ក្រុងច្បារមន ខេត្តកំពង់ស្ពឺ ។
ជាលទ្ធផល បានត្រួតពិនិត្យយានយន្តចំនួន០៦គ្រឿង មានបិទឡូហ្គោ TH,TS ផ្ទុកទម្ងន់សរុបចន្លោះពី ៤៩ តោនដល់៧២តោន លេីសទម្ងន់អនុញ្ញាតចន្លោះពី៩ តោនដល់៣២តោន។
ឆ្លៀតឱកាសនេះ លោកប្រធាន បានអប់រំ ណែនាំ ដល់ម្ចាស់យានយន្តល្មេីសខាងលេី ត្រូវចូលរួមគោរពច្បាប់ កុំដឹកលេីសទម្ងន់កម្រិតកំណត់បែបនេះបន្តទៀត ព្រោះការដឹកលេីសទម្ងន់របស់បងប្អូន គឺបានធ្វេីឱ្យខូចខាតដល់ផ្លូវថ្នល់យ៉ាងខ្លាំង មិនតែប៉ុននោះ បងប្អូនក៏ត្រូវរងការពិន័យជាប្រាក់ផងដែរ។
ក្រសួងសាធារណការ និងដឹកជញ្ជូន សូមរម្លឹកថាក្រុម ការងារត្រួតពិនិត្យយានយន្តចល័តចម្រុះ នៅតែបន្តចុះឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅទូទាំងប្រទេស ដើម្បីទប់ស្កាត់ និងចាត់ វិធានការរឹតបន្តឹងការអនុវត្តច្បាប់យ៉ាងតឹងរ៉ឹងបំផុតដោយគ្មានការលើកលែងឡើយ៕
