ភ្នំពេញ៖ ជនសង្ស័យ២នាក់រួមទាំងថ្នាំញៀនមួយចំនួនធំត្រូវបានកម្លាំងអាវុធហត្ថខណ្ឌពោធិ៍សែនជ័យបើកការស៊ើបអង្កេតរហូតឈានទៅដល់ធ្វើការឃាត់ខ្លួននៅវេលាម៉ោង១១ និង១៥នាទីព្រឹកថ្ងៃទី១០ ខែកញ្ញា ឆ្នាំ២០១៦ នៅចំណុចផ្ទះអត់លេខផ្លូវលំ ភូមិត្រពាំងថ្លឹងសង្កាត់ចោមចៅ ខណ្ឌពោធិ៍សែនជ័យ។

ជនសង្ស័យទី១ឈ្មោះញឹក ពីណុល ភេទប្រុស អាយុ២៤ឆ្នាំ មុខរបសន្តិសុខ ស្នាក់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យមានស្រុកកំណើតនៅភូមិអង្គវស្រែ ឃុំត្រពាំងព្រីង ស្រុករមាហែក ខេត្តស្វាយរៀង និងទី២ឈ្មោះប៉ន អួច ភេទប្រុស អាយុ៣៤ឆ្នាំ មុខរបរមេការក្លឹបអិចសូន ស្នាក់នៅកន្លែងកើតហេតុ ។

លោក ស៊ន កែវវណ្ណធី មេបញ្ជាការរងអាវុធហត្ថខណ្ឌពោធិ៍សែនជ័យបានឲ្យដឹងថា ដោយមានការរាយការណ៍ពីប្រជាពលរដ្ឋទើបលោកបានដាក់កម្លាំងតាមដានធ្វើការស្រាវជ្រាវរហូតឈានទៅដល់ធ្វើការឃាត់ខ្លួនជនសង្ស័យទាំង២នាក់ខណៈកំពុងសំងំនៅក្នុងផ្ទះ។

លោកបានបន្តថា ក្នុងប្រតិបត្តិការខាងលើនេះសមត្ថកិច្ចរកឃើញថ្នាំញៀនក្រាមសថ្លាចំនួន១៧កញ្ចប់ធំល្មម៧កញ្ចប់ ធំ១ សរុប២៥កញ្ចប់ និងជញ្ជីងសម្រាប់ថ្លឹង១។

ក្រោយពីឃាត់ខ្លួនជនសង្ស័យត្រូវបានកម្លាំងអាវុធហត្ថបានបញ្ជូនទៅការិល័យក្រុងដើម្បីចាត់ការតាមនីតិវិធី៕

ដោយ៖ សុខា សែនជ័យ