ខេត្តស្វាយរៀង៖ រថយន្តទួរីសមួយគ្រឿងបានរេចង្កូតក្រឡាប់ធ្លាក់ទឹកប្រឡាយមុខផ្ទះប្រជាពលរដ្ឋ ខណៈអ្នកបើកបរងងុយដេកងោកមួយភាំង កាលពីវេលាម៉ោង១១ និង១៥នាទីព្រឹកថ្ងៃទី១០ ខែកញ្ញា ឆ្នាំ២០១៦ នៅលើផ្លូវជាតិលេខ១ នៅមុខផ្នែកសឹករងស្វាយជ្រំ ស្ថិតក្នុងភូមិត្របែក ឃុំស្វាយជ្រំស្រុក ស្វាយជ្រំ ខេត្តស្វាយរៀង ប៉ុន្តែមិនបណ្ដាលឲ្យគ្រោះថ្នាក់ដល់អាយុជីវិតនោះទេ។

បើតាមប្រជាពលរដ្ឋបានឃើញហេតុការណ៍នេះបានឲ្យដឹងថា នៅមុនពេលកើតហេតុគេឃើញរថយន្តម៉ាកទួរីស ពណ៌ទឹកប៊ិចចាស់ ពាក់ស្លាកលេខ ឆ2670ភព2 បើកបរដោយបុរសម្នាក់ឈ្មោះ អាត ធី ភេទប្រុស អាយុ២៥ឆ្នាំ រស់នៅផ្សាអ្នកលឿងភូមិ២ ឃុំព្រែកខ្សាយខ ស្រុកពាមរ៌ ខេត្តព្រៃវែង បើកពីកើតមកលិច លុះដល់ចំណុចកើតហេតុខាងលើក៏ឃើញរថយន្តរេចង្កូតមកខាងស្តាំដៃរួចក៏ហោះចូលទៅក្នុងស្រះក្រឡាប់ផ្ងាជើងតែម្តង។ ភ្លាមៗនោះគេឃើញអ្នកបើករថយន្តស្រវេស្រវ៉ាចេញពីរថយន្តតែសំណាងល្អមិនបណ្តាលឲ្យរងរបួសធ្ងន់ គ្រាន់តែរងរបួសស្រាលប៉ុណ្ណោះ។

ក្រោយពីកើតហេតុសមត្ថកិច្ចចរាចរស្រុកស្វាយជ្រំយករថយន្តដឹកដីមកអុសរថយន្តបង្កហេតុខាងលើយកទៅរក្សាទុកអធិការដ្ឋាននគរបាលស្រុកស្វាយជ្រំរងចាំម្ចាស់មកដោះស្រាយ។ បច្ចុប្បន្នបញ្ជូនទៅសម្រាកនៅមន្ទីរពេទ្យបង្អែកស្វាយជ្រំ៕

ដោយ៖ យឹម សុថាន