ខេត្តព្រះសីហនុ៖ អនុវត្តតាមអនុសាសន៍នាយឧត្តម សេនីយ៍ ស ថេត អគ្គស្នងការនគរបាលជាតិ និងការចង្អុលបង្ហាញដោយផ្ទាល់របស់ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ លោកឧត្តមសេនីយ៍ត្រី ណុប បញ្ញា ស្នងការរងផែនការងារនគរបាលព្រហ្មទណ្ឌ ដឹកនាំកម្លាំងនគរបាលជំនាញបង្ក្រាបបទល្មើសជាច្រើនករណីដូចតទៅ ៖

១. បង្ក្រាបករណីលួចកាត់ខ្សែភ្លើង
នៅថ្ងៃទី១៤ ខែវិច្ឆិកា ឆ្នាំ២០២៥ វេលាម៉ោង ២៣:០០ កម្លាំងជំនាញបានឃាត់ខ្លួនជនសង្ស័យម្នាក់ឈ្មោះ សយ ស្នា បន្ទាប់ពីលួចកាត់ខ្សែភ្លើងនៅអគារសួនសុបិន្តចាស់ ស្ថិតនៅសង្កាត់លេខ៤ ក្រុងព្រះសីហនុ ហើយព្យាយាមប៉ុនប៉ងវាយជនរងគ្រោះដោយកាំបិត ។ កម្លាំងបានចាប់ខ្លួនជនសង្ស័យ និងវត្ថុតាង (កាំបិត១ដើម) បញ្ជូនទៅការិយាល័យជំនាញដើម្បីចាត់ការតាមច្បាប់ ។

២. ករណីកាន់កាប់អាវុធដោយគ្មានការអនុញ្ញាត
នៅថ្ងៃទី១៥ ខែវិច្ឆិកា ឆ្នាំ២០២៥ វេលាម៉ោង ០២:៣០ កម្លាំងជំនាញបានឃាត់ម៉ូតូគ្មានស្លាកលេខ១គ្រឿង ជិះ គ្នាមានចំនួន០២នាក់ មានការសង្ស័យ ពេលត្រួតពិនិត្យបានរកឃើញកាំបិតបុ័ងតោ១ដើម និងដង្កាប់១ដើមនៅក្នុងកែបម៉ូតូ ។ ជនសង្ស័យទាំង០២នាក់មានឈ្មោះ បៀន ហ៊ា និងឈ្មោះ សាន សម្ភស្ស ត្រូវបានចាប់ខ្លួនជាមួយវត្ថុតាង និងបញ្ជូនទៅតុលាការ ។

៣. ករណីឆក់ទូរស័ព្ទ
នៅថ្ងៃទី១៥ ខែវិច្ឆិកា ឆ្នាំ២០២៥ វេលាម៉ោង ០២:៣០ មានករណីជនសង្ស័យម្នាក់ឈ្មោះ ប៉ិប រស្មី បានឆក់ទូរស័ព្ទ OPPO ពណ៌ទឹកប្រាក់ ពីស្ត្រីម្នាក់នៅចិញ្ចើមផ្លូវជាតិលេខ៤ ។ កម្លាំងប៉ុស្តិ៍ និងកម្លាំងអធិការដ្ឋាននគរបាលស្រុកព្រៃនប់ បានដេញស្ទាក់ចាប់ខ្លួនភ្លាមៗ និងបានសងខ្សែទូរស័ព្ទវិញឱ្យម្ចាស់ដើម ។

៤. ករណីឆក់កាបូបបណ្តាលឱ្យជនរងគ្រោះរងរបួសធ្ងន់
នៅថ្ងៃ១៥ ខែវិច្ឆិកា ឆ្នាំ២០២៥ វេលាម៉ោង ០១:១០ មានករណីជនសង្ស័យ ០២នាក់ បានឆក់កាបូបពីស្ត្រីម្នាក់ បណ្តាលឲ្យដួលម៉ូតូរងរបួសធ្ងន់ ស្ថិតនៅសង្កាត់លេខ៣ ក្រុងព្រះសីហនុ ។ កម្លាំងព្រហ្មទណ្ឌបានស្រាវជ្រាវ និងឃាត់ជនសង្ស័យមានឈ្មោះ ហេង វ៉ៃ ឈ្មោះសោម ចាន់ និងឈ្មោះ ស៊ន់ ចាន់រាជ ព្រមទាំងរកឃើញកាបូប និងទូរស័ព្ទ IPHONE 14 PROMAX របស់ជនរងគ្រោះ (បានប្រគល់វិញ) ។ ជនរងគ្រោះរងរបួសពេញមុខ និងនៅលើខ្លួនច្រើនកន្លែងទៀត ។

៥. ករណីឆក់កាបូប
នៅថ្ងៃទី១២ ខែវិច្ឆិកា ឆ្នាំ២០២៥ វេលាម៉ោង២២:០០ កម្លាំងនគរបាលបានទទួលការរាយការណ៍ថា មានបុរស២នាក់បានឆក់កាបូបពីស្ត្រីជនរងគ្រោះម្នាក់ហើយគេចខ្លួនបាត់ ។ ក្រោយការស្រាវជ្រាវរយៈពេលជាច្រើនម៉ោង កម្លាំងល្បាតរបស់ការិយាល័យនគរបាលព្រហ្មទណ្ឌកម្រិតស្រាល បានឃាត់ខ្លួនជនសង្ស័យបានចំនួន ០២នាក់ នៅភូមិ៣ សង្កាត់១ ក្រុងព្រះសីហនុ និងយកមកសួរនាំតាមនីតិវិធី ។ ជនសង្ស័យមានឈ្មោះ ស៊ុន សុភី និងឈ្មោះ ផាន់ លីសុជាតិ ។ ករណីនេះត្រូវបានកសាងសំណុំរឿងដោយការិយាល័យជំនាញ និងបញ្ជូនទៅសាលាដំបូងខេត្តព្រះសីហនុ ដើម្បីចាត់ការតាមនិតិវិធីច្បាប់ ។

៦. បង្ក្រាបករណីលួចម៉ូទ័របូមទឹក
នៅថ្ងៃទី១៦ ខែវិច្ឆិកា ឆ្នាំ២០២៥ វេលា០៣:០០នាទី មានជនសង្ស័យ ០២នាក់ លួចម៉ូទ័របូមទឹកពីអគារកាស៊ីណូ ចយ ស្ថិតនៅក្នុងសង្កាត់លេខ២ ។ ជនរងគ្រោះ (សន្តិសុខ) បានឃើញហើយឃាត់ខ្លួនទាំងពីរប្រគល់សមត្ថកិច្ចជាមួយវត្ថុតាង ។ ករណីនេះត្រូវបានកសាងសំណុំរឿងបញ្ជូនតាមច្បាប់ ។

៧. ករណីរំលោភទំនុកចិត្ត (ខ្ចីម៉ូតូនាំទៅបញ្ចាំ)
នៅថ្ងៃទី២០ ខែតុលា ឆ្នាំ២០២៥ មានស្ត្រីម្នាក់ខ្ចីម៉ូតូ HONDA SCOOPYCLUB12 ពីមិត្តរួមការងារ ដោយអះអាងថាយកទៅដាក់ពាក្យធ្វើការ បន្ទាប់មកបាត់អវត្តមាន និងប្លុកលេខជនរងគ្រោះ ។ សមត្ថកិច្ចសង្កាត់លេខ៤ ស្រាវជ្រាវរហូតដល់ថ្ងៃទី១៧ ខែវិច្ឆិកា និងឃាត់ខ្លួនជនសង្ស័យបាន ។ សំណុំរឿងត្រូវបានបញ្ជូនចាត់ការតាមច្បាប់ ។

៨. បង្ក្រាបករណីប៉ុនប៉ងលួចម៉ូតូ (បែកសោ ក មិនសម្រេច)
នៅថ្ងៃទី១៩ ខែវិច្ឆិកា ឆ្នាំ២០២៥ វេលា២៣:៣០នាទី មានករណីជនសង្ស័យម្នាក់ បានបែកសោក និងតខ្សែភ្លើងម៉ូតូ ZUZUKI NEX របស់ប្រជាពលរដ្ឋ ប៉ុនប៉ងលួចមិនបានសម្រេច ម្ចាស់បានឃើញពីកាមេរ៉ា បានរាយការណ៍ប្រាប់សមត្ថកិច្ចបានឃាត់ខ្លួនជនសង្ស័យបាន និងចាប់យកឧបករណ៍ប្រើសកម្មភាពមួយចំនួន ករណីត្រូវបានបញ្ជូនតាមនីតិវិធី ។

៩. បង្ក្រាបករណីលួចម៉ូតូ
នៅថ្ងៃទី៦ ខែវិច្ឆិកា ឆ្នាំ២០២៥ នៅតូបជួសជុលម៉ូតូ សង្កាត់លេខ៤ មានជនសង្ស័យ ០២នាក់បានលួចម៉ូតូ HONDA DREAM របស់ជនរងគ្រោះ ។ មនុស្សម្នាក់ត្រូវបានឃាត់ខ្លួន ខណៈម្នាក់ទៀតកំពុងគេចខ្លួន ។ សមត្ថកិច្ចកំពុងបន្តស្រាវជ្រាវ និងចាត់ការតាមនិតិវិធី ។

១០. បង្ក្រាបករណីឆបោក
សមត្ថកិច្ចបានឃាត់ខ្លួនឈ្មោះ សុខ ស្រីម៉ុច ភេទស្រី អាយុ៣៩ឆ្នាំ ដែលបានបង្កើតគណនី Telegram បោកបញ្ឆោតជនរងគ្រោះ ជី ចាន់ណាក់ ភេទប្រុស អាយុ២២ឆ្នាំ ឲ្យផ្ទេរប្រាក់សរុប 7,500$ ជាបន្តបន្ទាប់ ដោយប្រើរូបស្រីផ្សេងៗឆបោកស្នេហា ។ ករណីកើតឡើងនៅមុខកាស៊ីណូ ប៉ឡាយ ក្រោយជនរងគ្រោះដឹងការពិតបានរាយការណ៍ ហើយសមត្ថកិច្ចបានឃាត់ខ្លួនជនសង្ស័យ និងបញ្ជូនសំណុំរឿង ទៅតុលាការតាមនីតិវិធី ។

១១. បង្ក្រាបក្រុមក្មេងទំនើងប្រើអំពើហិង្សា
ករណីវាយគ្នាទៅវិញទៅមករវាងក្រុមក្មេងស្ទាវពីរចំនួន២ក្រុម កើតឡើងពីរដង (ថ្ងៃទី០៥ និងថ្ងៃ២២ ខែវិច្ឆិកា ២០២៥ នៅតូបលក់អីវ៉ាន់អូរ៥ ។ សមត្ថកិច្ចឃាត់ខ្លួនបាន១៣នាក់ បន្ទាប់ពីសួរនាំបានរកឃើញថា មាន ០៤នាក់ពាក់ព័ន្ធពិតប្រាកដ ។ ករណីនេះពាក់ព័ន្ធ ៣នាក់ត្រូវបានបញ្ជូនទៅសាលាដំបូងតាមច្បាប់ ។

១២. បង្ក្រាបករណីកាន់អាវុធ និងជួញដូរមនុស្ស
សមត្ថកិច្ចបានឃាត់ខ្លួនជនជាតិចិនម្នាក់មានឈ្មោះ ZHANG QIUGANG ភេទប្រុស កើតឆ្នាំ១៩៨៨ ពាក់ព័ន្ធបទល្មើសកាន់កាប់ដឹកជញ្ជូនអាវុធគ្មានច្បាប់ លក់ដូរមនុស្សមានគោលដៅ ។ វត្ថុតាងចាប់យកបានរួមមានអាវុធខ្លី ២ដើម គ្រាប់កាំភ្លើង០៩គ្រាប់ iPhone 15 Pro Max iPad Air កាំបិត 0កូនសោ កាបូបកាត Samanum ។ ករណីនេះត្រូវបានបញ្ជូនទៅតុលាការចាត់ការតាមច្បាប់ ។

១៣. បង្ក្រាបករណីធ្វើឲ្យខូចខាតដោយចេតនា
សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ម៉ែន ឡេង ភេទប្រុស អាយុ៣២ឆ្នាំ ដែលវាយបំផ្លាញម៉ូតូបងស្រីរបស់ខ្លួនដោយសារផឹកស្រាស្រវឹង និងខឹងពាក្យស្តីបន្ទោស ។ ករណីនេះកើតហេតុនៅភូមិ៣ សង្កាត់លេខ៣ ក្រុង-ខេត្តព្រះសីហនុ ។ ជនសង្ស័យត្រូវបានសាកសួរ និងបញ្ជូនសំណុំរឿងបន្តតាមនីតិវិធី ឭ

១៤. បង្ក្រាបក្មេងទំនើងវាយគ្នា នៅតំបន់ទឹកធ្លាក់ក្បាលឆាយ.

នៅថ្ងៃទី២២ ខែវិច្ឆិកា ឆ្នាំ២០២៥ ក្រុមក្មេងទំនើងពីរក្រុមបានធ្វើសកម្មភាពវាយ កាប់ ចាក់គ្នា ដោយប្រើដំបង កាំបិត មួកសុវត្ថិភាព និងវាយបំផ្លាញម៉ូតូគ្នាទៅវិញទៅមក នៅតំបន់ក្បាលឆាយ ស្ថិតនៅភូមិ១ សង្កាត់លេខ១ ក្រុង-ខេត្តព្រះសីហនុ ។ សមត្ថកិច្ចបានចុះអន្តរាគមន៍ភ្លាម និងដោះស្រាយករណីតាមនីតិវិធី ក្រោមការសម្របសម្រួលរបស់ព្រះរាជអាជ្ញា ៕