ខេត្តព្រះសីហនុ៖ លោក ផន រឹម អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី០៤ ខែធ្នូ ឆ្នាំ២០២៥នេះ ជម្រាបជូនសាធារណជន និងអ្នកធ្វើដំណើរលើផ្លូវល្បឿនលឿនភ្នំពេញ-ព្រះសីហនុ មេត្តាជ្រាបថា នៅថ្ងៃទី៣ ខែធ្នូ ឆ្នាំ២០២៥ វេលាម៉ោង ១៨ និង៤៦នាទី ក្រុមការងារក្រុមហ៊ុន សហការជាមួយនគរបាលប្រចាំផ្លូវល្បឿនលឿន បានឃាត់រថយន្តម៉ាក Toyota ViGo ពណ៍ស ពាក់ស្លាកលេខ ភ្នំពេញ ២BT-២៨៣៧ ដែលផ្ទុកទំនិញជ្រុះលើផ្លូវល្បឿនលឿន ធ្វើកិច្ចសន្យាអប់រំណែនាំ និងពិន័យតាមច្បាប់ស្តីពីចរាចរណ៍ផ្លូវគោករួចរាល់។
គួរជម្រាបជូនថា បន្ទាប់ពីប្រជាពលរដ្ឋដែលធ្វើដំណើរតាមផ្លូវល្បឿនលឿន បានឃើញរថយន្តម៉ាក Toyota ViGo ពណ៍ស ពាក់ស្លាកលេខ ភ្នំពេញ ២BT-២៨៣៧ ដែលផ្ទុកទំនិញនៅកន្ទុយក្រោយ បានបេីកយ៉ាងលឿនមិនមានការប្រុងប្រយ័ត្ន បណ្ដាលឱ្យជ្រុះធ្លាក់មកលើផ្លូវល្បឿនលឿន ប៉ុន្តែសំណាងល្អមិនបង្កការគ្រោះថ្នាក់ដល់អ្នកដទៃ។
ភ្លាមនោះលោក ផន រឹម ក៏បានអំពាវនាវឱ្យម្ចាស់រថយន្ត(ដូចមានភិនភាគក្នុងវីដេអូ)ចូលខ្លួនដោះស្រាយជាមួយក្រុមហ៊ុនផ្លូវល្បឿនលឿនភ្នំពេញ-ព្រះសីហនុ។ លោកអ្នកនាំពាក្យរូបនេះ ក៏បានបញ្ជាក់ថា៖ រថយន្តនេះ បានចូលមកផ្លូវល្បឿនលឿន នៅច្រកស្ទឹងហាវPk172 មកចេញនៅច្រកស្រែអំបិល PK135។ បច្ចុប្បន្ន ម្ចាស់រថយន្ត ត្រូវបានសមត្ថកិច្ចជំនាញ ធ្វើកិច្ចសន្យាអប់រំណែនាំ និងពិន័យតាមច្បាប់ស្តីពីចរាចរណ៍ផ្លូវគោករួចរាល់ផងដែរ៕ដោយ៖តារា
