បច្ចុប្បន្នលោក Pham Nhat Vuong អ្នកមានជាងគេនៅវៀតណាមគឺជាមហាសេដ្ឋីមានបំផុតទីពីរនៅអាស៊ីអាគ្នេយ៍ ដោយសារការកើនឡើងនៃភាគហ៊ុន Vingroup របស់គាត់នៅឆ្នាំនេះ។

បើយោងតាមទស្សនាវដ្តី Forbes ប្រធានក្រុមហ៊ុនវ័យ 57 ឆ្នាំរូបនេះឥឡូវមានទ្រព្យសម្បត្តិ 26.5 ពាន់លានដុល្លារអាមេរិក កើនឡើង 4 ដងចាប់តាំងពីដើមឆ្នាំនេះ។

លោក Vuong ដែលជាប់ចំណាត់ថ្នាក់ទី 85 ជាអ្នកមានជាងគេលើពិភពលោក គឺជាជនជាតិវៀតណាមដំបូងគេក្នុងចំណោមអ្នកមានបំផុតទាំង 100 របស់ពិភពលោក។

គាត់បានទទួលអត្ថប្រយោជន៍ពីការកើនឡើង 7 ដងនៃតម្លៃភាគហ៊ុនរបស់ Vingroup ចាប់តាំងពីដើមឆ្នាំនេះ ដែលជំរុញដោយការពង្រីកក្រុមហ៊ុនផលិតរថយន្តរបស់ខ្លួន VinFast នៅក្នុងទីផ្សារថ្មីៗដូចជាប្រទេសឥណ្ឌា និងឥណ្ឌូនេស៊ី និងការបណ្តាក់ទុករបស់លោក Vuong ទៅក្នុងឧស្សាហកម្មថ្មីៗដូចជាផ្លូវដែក ដែកថែប និងលំហអាកាស។

នៅក្នុងតំបន់អាស៊ីអាគ្នេយ៍ លោកតាមពីក្រោយមហាសេដ្ឋីតែម្នាក់គឺលោក Prajogo Pangestu ដែលជាមហាសេដ្ឋីថាមពលឥណ្ឌូណេស៊ីអាយុ 81 ឆ្នាំប៉ុណ្ណោះ។

លោកPangestu ឥឡូវនេះមានទ្រព្យតម្លៃ 41.3 ពាន់លានដុល្លារ ខណៈដែលទ្រព្យសម្បត្តិរបស់គាត់បានកើនឡើងទ្វេដងធៀបនឹងដើមឆ្នាំនេះ។ អ្នកមានបំផុតទី 40 នៅទូទាំងពិភពលោកនេះ គឺជាស្ថាបនិក និងជាប្រធានក្រុមហ៊ុន Barito Pacific ដែលជាក្រុមហ៊ុនគីមីឥន្ធនៈដ៏ធំបំផុតនៅក្នុងប្រទេសឥណ្ឌូនេស៊ី និងមានចំណាប់អារម្មណ៍លើការផលិតថាមពល និងការផលិតប្លាស្ទិក។

ចំណាត់ថ្នាក់ទី 3 នៅអាស៊ីអាគ្នេយ៍ និងទី 95 ទូទាំងពិភពលោកគឺលោក Low Tuck Kwong វ័យ 77 ឆ្នាំជនជាតិឥណ្ឌូនេស៊ីម្នាក់ទៀតដែលមានទ្រព្យសម្បត្តិសុទ្ធចំនួន 24.5 ពាន់លានដុល្លារ។ ត្រូវបានគេស្គាល់ថាជា “ស្តេចធ្យូងថ្ម” Kwong កើតនៅប្រទេសសិង្ហបុរីបានបង្កើតក្រុមហ៊ុន Bayan Resources ដែលជាក្រុមហ៊ុនរុករកធ្យូងថ្មនៅក្នុងប្រទេសឥណ្ឌូនេស៊ី។ គាត់បានចាប់ផ្តើមអាជីពរបស់គាត់ធ្វើការនៅក្រុមហ៊ុនសំណង់របស់ឪពុកគាត់នៅប្រទេសសិង្ហបុរីក្នុងវ័យជំទង់ មុនពេលផ្លាស់ទៅប្រទេសឥណ្ឌូនេស៊ីក្នុងឆ្នាំ 1972 ដើម្បីស្វែងរកឱកាសអាជីវកម្ម។ ចំណាត់ថ្នាក់ទី៤ គឺលោក R. Budi Hartono ដែលជាជនជាតិឥណ្ឌូនេស៊ី ដែលមានទ្រព្យសម្បត្តិសរុបចំនួន ២០.៦ ពាន់លានដុល្លារ។ បងប្រុសរបស់គាត់ឈ្មោះ Michael មានតម្លៃ 19.9 ពាន់លានដុល្លារ។ ទ្រព្យសម្បត្តិរបស់ពួកគេភាគច្រើនបានមកពីធនាគារ និងថ្នាំជក់៕