ថៃ៖ ប្រធានគណៈកម្មការរៀបចំការបោះឆ្នោតថៃ លោក Narong Klanwarin បានឱ្យដឹងតាមរយៈកាសែត The Nation នាថ្ងៃសុក្រទី១២ ខែធ្នូ ឆ្នាំ២០២៥នេះថា ស្ថាប័នខ្លួនបានត្រៀមខ្លួនរួចរាល់ហើយ ក្នុងការរៀបចំការបោះឆ្នោតជាតិឲ្យបានឆាប់តាមដែលអាចធ្វើទៅបាន ហើយបានបដិសេធនូវការព្រួយបារម្ភដែលថា គណៈកម្មការអាចមានភាពលម្អៀងទៅរកបក្សនយោបាយណាមួយ។
លោកប្រធានគណៈកម្មការរៀបចំការបោះឆ្នោតថៃរូបនេះ បានបញ្ជាក់ថា គណៈកម្មការរៀបចំការបោះឆ្នោត នឹងប្រជុំនៅថ្ងៃទី១៥-១៦ខែធ្នូ ដើម្បីកំណត់កាលបរិច្ឆេទបោះឆ្នោតចុងក្រោយ បន្ទាប់ពីនាយករដ្ឋមន្ត្រីបានរំលាយសភាតំណាងរាស្រ្ត។ លោកបានបន្ថែមថា គណៈកម្មការរៀបចំការបោះឆ្នោត បានត្រៀមលក្ខណៈរួចជាស្រេចសម្រាប់ការរំលាយនេះ រួមទាំងការងារលើការកំណត់មណ្ឌលបោះឆ្នោតឡើងវិញ។
ប្រធានគណៈកម្មការរៀបចំការបោះឆ្នោតថៃ បានប្រាប់អ្នកយកព័ត៌មានថា «ខ្ញុំគិតថា នៅត្រឹមថ្ងៃចន្ទ ឬថ្ងៃអង្គារ អ្វីៗនឹងមានភាពច្បាស់លាស់។ ការិយាល័យគណៈកម្មការរៀបចំការបោះឆ្នោត បានបញ្ចប់កាលវិភាគបោះឆ្នោត ហើយយើងត្រៀមខ្លួនរួចរាល់ហើយក្នុងការរៀបចំការបោះឆ្នោត។ វាអាចទៅរួចដែលថ្ងៃបោះឆ្នោតអាចនឹងត្រូវធ្វើឡើងនៅថ្ងៃទី៨ខែកុម្ភៈឆ្នាំ២០២៦»។
សូមជម្រាបថា ការរៀបចំការបោះឆ្នោតសាជាថ្មីនៅប្រទេសថៃ ធ្វើឡើងបន្ទាប់ពីព្រះមហាក្សត្រ Maha Vajiralongkorn បានចេញព្រះរាជក្រឹត្យអនុម័តការរំលាយសភា ហើយត្រៀមរៀបចំការបោះឆ្នោតថ្មីក្នុងរយៈពេល៤៥ទៅ៦០ថ្ងៃ។ ខណៈលោក អានុទីន ឆានវីរៈគុល នឹងដឹកនាំរដ្ឋបាលបណ្តោះអាសន្នរហូតដល់រដ្ឋាភិបាលថ្មីត្រូវបានបង្កើតឡើង។ វាជាការរំលាយសភាលើកទី១៦ ចាប់តាំងពីការបញ្ចប់របបរាជាធិបតេយ្យផ្តាច់ការក្នុងឆ្នាំ១៩៣២មក៕ដោយ៖តារា
លោក Narong Klanwarin (រូបថត៖ The Nation)
