ភ្នំពេញ៖ លោកស្រីឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងអ្នកនាំពាក្យក្រសួងការពារជាតិកម្ពុជា បានមានប្រសាសន៍ថា នៅថ្ងៃទី២៤ ខែធ្នូ ឆ្នាំ២០២៥នេះ គឺជាថ្ងៃទី១៨ហើយ ដែលទាហានឈ្លានពានថៃ បានក្បត់នឹងកិច្ចព្រមព្រៀងបទឈប់បាញ់ និងក្បត់កិច្ចព្រមព្រៀងសន្តិភាពកូឡាឡាំពួរ ដោយបន្តធ្វើការបាញ់ផ្លោងមកលើដែនអធិបតេយ្យ កម្ពុជាយ៉ាងកំរោលចូល នៅតំបន់យោធភូមិភាគីទី៤ និងយោធភូមិភាគទី៥កម្ពុជា។ ដោយរហូតមកដល់ពេលនេះ ភូមិសាស្រ្តខ្លះទាហានឈ្លានពានថៃនៅបន្តបាញ់យ៉ាងសន្ធប់នៅឡើយ។
ការមានប្រសាសន៍បែបនេះរបស់លោកស្រីឧត្តមសេនីយ៍ឯក ម៉ាលី សុជាតា ក្នុងពិធី «បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ពនិងជនស៊ីវិលកម្ពុជា» នាព្រឹកថ្ងៃទី២៤ ខែធ្នូ ឆ្នាំ២០២៥។
អ្នកនាំពាក្យក្រសួងការពារជាតិរូបនេះ បានឱ្យដឹងទៀតថា នៅថ្ងៃទី២៤ ខែធ្នូនេះដែរ ទាហានថ្មើរជើងរបស់ថៃអមដោយរថក្រោះ បានរុលចូលដែនអធិបតេយ្យកម្ពុជា នៅតំបន់ភូមិសាស្រ្តភូមិព្រៃចាន់ ប៉ុន្តែត្រូវបានវីរកងទ័ពកម្ពុជា បាននឹងកំពុងតស៊ូប្រយុទ្ធទប់ស្កាត់យ៉ាងស្វិតស្វាញបំផុតជាមួយសត្រូវឈ្លានពាន។
ជាមួយគ្នានេះ កម្ពុជានៅតែបន្ត អំពាវនាវយ៉ាងទទូចឲ្យសហគមន៍អន្តរជាតិដាក់សម្ពាធ និងធ្វើការថ្កោលទោសចំពោះទង្វើរឈ្លានពានរបស់ទាហានថៃ ដែលកំពុងបន្តបាញ់ផ្លោងយ៉ាងសន្ធប់ និងកំរោលចូល ទៅកាន់ទីកន្លែងរស់នៅ របស់ជនស៊ីវិលកម្ពុជា ដែលទង្វើនេះ គឺផ្ទុយនឹងច្បាប់មនុស្សធម៌អន្តរជាតិ។
បន្ថែមពីនេះ លោកស្រីឧត្តមសេនីយ៍ឯក ម៉ាលី សុជាតា បានអះអាងថា រហូតដល់ពេលវេលានេះ វីរកងទ័ព និងវីរនគរបាលកម្ពុជា បានកំពុងតស៊ូយ៉ាងស្វិតស្វាញ អង់អាចក្លាហាន និងមោះមុតបំផុត ប្រយុទ្ធប្រឆាំងជាមួយសត្រូវឈ្លានពានគ្រប់គោលដៅទាំងអស់ ។ ប្រជាពលរដ្ឋ ខ្មែរគ្រប់រូប ត្រូវជឿជាក់លើរាជរដ្ឋាភិបាល និងវីរកងទ័ពរបស់យើង ក្នុងកិច្ចការពារនូវអធិបតេយ្យ និងបូរណភាពទឹកដី ទោះក្នុងតម្លៃណាក៏ដោយ៕
ដោយ៖ស តារា
