កូរ៉េខាងត្បូង៖ រដ្ឋាភិបាលកូរ៉េខាងត្បូង នៅថ្ងៃទី២៣ ខែធ្នូ ឆ្នាំ២០២៥ បានជំរុញឱ្យកម្ពុជា និងថៃ ដោះស្រាយជម្លោះព្រំដែនដោយសន្តិវិធី តាមរយៈការសន្ទនាឱ្យបានឆាប់តាមដែលអាចធ្វើទៅបាន។ កូរ៉េខាងត្បូង ជំរុញឲ្យភាគីទាំងពីរបន្ធូរបន្ថយភាពតានតឹងនៃការប៉ះទង្គិចគ្នានៃកម្លាំងប្រដាប់អាវុធនៅតាមព្រំដែន ដែលបានបណ្តាលឱ្យមានមនុស្សស្លាប់ និងរបួសជាច្រើននាក់។
លោក ផាក អ៊ីល អ្នកនាំពាក្យក្រសួងការបរទេសកូរ៉េខាងត្បូង បានមានប្រសាសន៍នៅក្នុងអត្ថាធិប្បាយមួយថា “កូរ៉េពេញចិត្តចំពោះកិច្ចខិតខំប្រឹងប្រែងរបស់អាស៊ាន ក្នុងការបន្ធូរបន្ថយភាពតានតឹង និងស្វែងរកដំណោះស្រាយដោយសន្តិវិធីចំពោះស្ថានភាពនេះ។ រដ្ឋាភិបាលកូរ៉េ ជំរុញឱ្យកម្ពុជា និងថៃ ដោះស្រាយស្ថានការណ៍ដោយសន្តិវិធីតាមរយៈការសន្ទនាឱ្យបានឆាប់តាមដែលអាចធ្វើទៅបាន”។
អ្នកនាំពាក្យក្រសួងការបរទេសកូរ៉េខាងត្បូងរូបនេះ បានបន្តថា ទីក្រុងសេអ៊ូល ស្វាគមន៍ចំពោះការរៀបចំកិច្ចប្រជុំរដ្ឋមន្ត្រីការបរទេសពិសេសក្នុងចំណោមសមាជិក១១ប្រទេសនៃសមាគមប្រជាជាតិអាស៊ីអាគ្នេយ៍ (អាស៊ាន) ដែលទាំងកម្ពុជា និងថៃ ជាសមាជិក ដើម្បីដោះស្រាយស្ថានការណ៍នេះ៕ដោយ៖តារា
រូបភាព៖ លោក ផាក អ៊ីល អ្នកនាំពាក្យក្រសួងការបរទេសកូរ៉េខាងត្បូង
