សហរដ្ឋអាមេរិកបានព្រមានអុីរ៉ង់អំពីអន្តរាគមន៍ដែលអាចកើតមានចំពេលមានការតវ៉ាយ៉ាងទូលំទូលាយជុំវិញការលំបាកផ្នែកសេដ្ឋកិច្ច។

នៅថ្ងៃទី 2 ខែមករា ប្រធានាធិបតីអាមេរិក ដូណាល់ ត្រាំ បានសរសេរនៅលើវេទិកាប្រព័ន្ធផ្សព្វផ្សាយសង្គម Truth Social ថា លោក «ត្រៀមខ្លួនរួចជាស្រេចដើម្បីធ្វើសកម្មភាព» ប្រសិនបើអុីរ៉ង់ចាត់វិធានការយ៉ាងម៉ឺងម៉ាត់ប្រឆាំងនឹងក្រុមបាតុករដោយសន្តិវិធី។ អុីរ៉ង់មិនបានធ្វើអត្ថាធិប្បាយលើសេចក្តីថ្លែងការណ៍របស់លោក Trump ទេ។
សេចក្តីថ្លែងការណ៍នេះកើតឡើងបន្ទាប់ពីមនុស្ស៦នាក់ត្រូវបានសម្លាប់ រួមទាំងជនស៊ីវិលនិងមន្ត្រីអនុវត្តច្បាប់ នៅក្នុងការតវ៉ាចាប់តាំងពីថ្ងៃទី 31 ខែធ្នូ ឆ្នាំ 2025 ដែលជាការតវ៉ាដ៏ធំបំផុតនៅក្នុងប្រទេសអុីរ៉ង់ក្នុងរយៈពេលបីឆ្នាំ ដែលបានផ្ទុះឡើងដោយសារតែការលំបាកផ្នែកសេដ្ឋកិច្ច។ ការតវ៉ាខ្លះបានប្រែក្លាយទៅជាអំពើហិង្សា។
ទីភ្នាក់ងារសារព័ត៌មានពាក់កណ្តាលផ្លូវការរបស់អុីរ៉ង់ Fars បានរាយការណ៍ថា មនុស្សពីរនាក់ត្រូវបានសម្លាប់នៅក្នុងការប៉ះទង្គិចគ្នារវាងក្រុមបាតុករ នឹងកងកម្លាំងសន្តិសុខនៅក្នុងទីក្រុង Lordegan ភាគនិរតីនៃប្រទេសអុីរ៉ង់។ Fars ក៏បានរាយការណ៍ផងដែរថា មនុស្សបីនាក់ផ្សេងទៀតត្រូវបានសម្លាប់នៅ Azna និងម្នាក់ទៀតនៅ Kouhdasht ដែលទាំងអស់ស្ថិតនៅភាគខាងលិចនៃប្រទេស។
នៅថ្ងៃទី 1 ខែមករា វីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមបានបង្ហាញពីរថយន្តជាច្រើនគ្រឿងត្រូវបានដុតក្នុងអំឡុងពេលប៉ះទង្គិចគ្នារវាងក្រុមបាតុករ នឹងកងកម្លាំងសន្តិសុខ។
ការប៉ះទង្គិចគ្នារវាងក្រុមបាតុករ នឹងកងកម្លាំងសន្តិសុខបានបង្ហាញពីរលកនៃភាពចលាចល ចាប់តាំងពីម្ចាស់អាជីវកម្មខ្នាតតូចបានចាប់ផ្តើមចេញតាមដងផ្លូវនៅចុងឆ្នាំមុន ដើម្បីតវ៉ាប្រឆាំងនឹងការដោះស្រាយរបស់រដ្ឋាភិបាលចំពោះការធ្លាក់ចុះយ៉ាងខ្លាំងនៃតម្លៃរូបិយប័ណ្ណក្នុងស្រុក និងការកើនឡើងយ៉ាងឆាប់រហ័សនៃតម្លៃ។
សេដ្ឋកិច្ចអុីរ៉ង់បានតស៊ូអស់រយៈពេលជាច្រើនឆ្នាំ ចាប់តាំងពីសហរដ្ឋអាមេរិកបានដាក់ទណ្ឌកម្មឡើងវិញនៅឆ្នាំ ២០១៨ បន្ទាប់ពីលោក Trump បានដកខ្លួនចេញពីកិច្ចព្រមព្រៀងនុយក្លេអ៊ែរអន្តរជាតិក្នុងអាណត្តិប្រធានាធិបតីដំបូងរបស់លោក៕ ដោយធីរីណា

រូប​ថត​: danviet