ខេត្តបន្ទាយមានជ័យ : លោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ នៅរសៀលថ្ងៃអង្គារ ២កើត ខែមាឃ ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី២០ ខែមករា ឆ្នាំ២០២៦ បានចាត់លោកឧត្តមសេនីយ៍ត្រី រ៉ែម វីរៈ ស្នងការរងផែនការងារសេនាធិការ រួមទាំងសហការី ចុះសួរសុខទុក្ខនិងនាំយកអំណោយដ៏ថ្លៃថ្លារបស់លោកនាយឧត្តមសេនីយ៍ ស ថេត អគ្គស្នងការ នគរបាលជាតិ មានថវិកាចំនួន២លានរៀលនិងទឹកត្រចៀកកាំជូនដល់លោកអនុសេនីយ៍ត្រី គៀត ស៊ីម៉ាក់ នាយរងប៉ុស្តិ៍នគរបាលរដ្ឋបាលគោកកឋិនដែលរងរបួសក្នុងសមរភូមិកន្លងមក ហើយកំពុងព្យាបាលនៅមន្ទីរពេទ្យមិត្តភាពកម្ពុជា-ជប៉ុន ខេត្តបន្ទាយមានជ័យ ។
ក្នុងឱកាសចុះសួរសុខទុក្ខនេះដែរ លោកឧត្តមសេនីយ៍ស្នងការរងតំណាងលោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យក៏បានពាំនាំការសួរសុខទុក្ខពីលោកនាយឧត្តមសេនីយ៍ ស ថេត អគ្គស្នងការ នគរបាលជាតិចំពោះលោកអនុសេនីយ៍ត្រី គៀត ស៊ីម៉ាក់ និងបានលើកទឹកចិត្ត និងជូនពរឱ្យឆាប់ជា មានសុខភាពល្អមាំទាំឡើងវិញ ដែលក្នុងខណៈនេះថ្នាក់ដឹកនាំតែងតែគិតគូរពីសុខទុក្ខបងប្អូនជានិច្ចនិងយកចិត្តទុកដាក់ខ្ពស់ដល់គ្រប់កងកម្លាំងទាំងអស់ ហើយប្ដេជ្ញាមិនបោះបង់បងប្អូនគ្រប់គ្នានោះទេ។ ជាមួយគ្នានេះលោកឧត្ដមសេនីយ៍ត្រីស្នងការរងក៏បានសំណូមពរដល់ក្រុមគ្រូពេទ្យឱ្យជួយមើលថែអ្នកជម្ងឺរូបនេះរហូតដល់ជាសះស្បើយ ។
សូមបញ្ជាក់ថា លោកអនុសេនីយ៍ត្រី គៀត ស៊ីម៉ាក់ នាយរងប៉ុស្តិ៍នគរបាលរដ្ឋបាលគោកកឋិន នៃអធិការដ្ឋាននគរបាលស្រុកថ្មពួកដែលរងរបួសក្នុងសមរភូមិ និងត្រូវបានទាហានថៃចាប់បានកាលពីថ្ងៃទី២៤ ខែធ្នូឆ្នាំ២០២៥ កន្លងទៅ ត្រូវបានថៃបញ្ជូនមកវិញនៅថ្ងៃទី២០ ខែមករាឆ្នាំ២០២៦នេះ៕ 
ដោយ : សិលា
