ខេត្តស្ទឹងត្រែង ៖ ក្រោមបទបញ្ជាដ៏ម៉ឺងម៉ាត់ពីសំណាក់ លោកឧត្តមសេនីយ៍ត្រី សេង សុភាព មេបញ្ជាការកង រាជអាវុធហត្ថខេត្តស្ទឹងត្រែង និងដោយមានការសម្រប សម្រួលនីតិវិធីពី លោកកែវ សុធា ព្រះរាជអាជ្ញាអមសាលាដំបូងខេត្ត កម្លាំងជំនាញបានធ្វើការឃាត់ខ្លួនជនសង្ស័យចំនួន០២នាក់ ពាក់ព័ន្ធករណីលួច និងគ្រឿងញៀន ។
តាមប្រភពព័ត៌មានឱ្យដឹងថា កាលពីថ្ងៃទី១៤ ខែ កុម្ភៈ ឆ្នាំ២០២៦ វេលាម៉ោង១៩:០០នាទីយប់ ការិយាល័យព្រហ្មទណ្ឌនៃមន្ទីរស្រាវជ្រាវ និងបង្ក្រាបបទល្មើស បានទទួលពាក្យបណ្ដឹងពីជនរងគ្រោះឈ្មោះ ហ៊ឹម ខរី (ហៅ ឡី) ភេទស្រី អាយុ ៣៧ឆ្នាំ ជនជាតិខ្មែរឥស្លាម មុខរបរកសិករ ដែលមានទីលំនៅបច្ចុប្បន្ននៅភូមិអភិវឌ្ឍន៍ ឃុំកោះសំពាយ ស្រុកសៀមបូក ខេត្តស្ទឹងត្រែង បន្ទាប់ពីបាត់បង់ទូរស័ព្ទដៃម៉ាកViVOចំនួន០១គ្រឿង ។
ក្រោយទទួលពាក្យបណ្ដឹងភ្លាម កម្លាំងមន្ទីរស្រាវជ្រាវ និងបង្ក្រាបបទល្មើស ដឹកនាំដោយ លោកវរសេនីយ៍ទោ ហ៊ាន សុវណ្ណារិទ្ធ ប្រធានមន្ទីរ សហការជាមួយកម្លាំងស្នាក់ការសន្តិសុខ៧២២ បានបើកការស្រាវជ្រាវរហូតឈានដល់ការឃាត់ខ្លួនជនសង្ស័យបានចំនួន ០២នាក់ ។ ក្នុងប្រតិបត្តិការនោះ សមត្ថកិច្ចក៏បានរកឃើញនូវឧបករណ៍សម្រាប់សេព និងថ្នាំញៀនមួយចំនួនទៀតផងដែរ ។
បច្ចុប្បន្ន ជនសង្ស័យទាំង០២នាក់ រួមជាមួយវត្ថុតាង ត្រូវបានការិយាល័យជំនាញកសាងសំណុំរឿងដើម្បីបញ្ជូនទៅកាន់សាលាដំបូងខេត្តស្ទឹងត្រែង ចាត់ការបន្តតាមនីតិវិធីច្បាប់៕
