ភ្នំពេញ៖ នារីវ័យក្មេង៤នាក់ជិះម៉ូតូម៉ាកហុងដាឌ្រីម សង់សេ១២៥មួយគ្រឿងឌុបគ្នាចេញពីកន្លែងញាុំអាហារនៅជិតគល់ស្ពានកោះពេជ្របំណងទៅផ្ទះត្រូវបានជនសង្ស័យមានគ្នាជាង១០នាក់ជិះម៉ូតូជាច្រើនគ្រឿងបានមកក្បែរហើយធាក់ផ្តួលវាយប្លន់យកម៉ូតូពីជនរងគ្រោះ តែមិនបានសម្រេចត្រូវសមត្ថកិច្ចឃាត់ខ្លួនបាន២នាក់ភ្លាមៗ។

ហេតុការណ៍ភ្ញាក់ផ្អើលនេះបានកើតឡើង កាលពីវេលាម៉ោង១ និង២០នាទីរំលងអាធ្រាត្រឈានចូលថ្ងៃទី១៥ ខែកញ្ញា ឆ្នាំ២០១៦ នៅចំណុចមុខណាហ្គា ស្ថិតក្នុង សង្កាត់ចតុមុខ ខណ្ឌដូនពេញ។ ភ្លាមនោះដែរត្រូវបានកម្លាំងនគរបាលល្បាតប្រទះឃើញក៏ផ្ទុះអាវុធចំនួន២គ្រាប់ធ្វើឲ្យជនសង្ស័យភ័យនាំគ្នាជិះម៉ូតូរត់រហូតដល់ចំណុចមុខវត្តកោះផ្លូវព្រះមុន្នីវង់្សទើបឃាត់បាន២នាក់។

តាមសម្ដីជនរងគ្រោះបានឲ្យដឹងថា នៅមុនពេលកើតហេតុជនរងគ្រោះមានគ្នា៤នាក់ជិះម៉ូតូឌ្រីមសងមួយគ្រឿង បានជិះឌុបគ្នាមកពីអង្គុយញាុំអាហារនៅសួនជិតគល់ស្ពានកោះពេជ្រ ពេលញាុំចប់ទើបនាំគ្នាចេញមកវិញដោយបំណងត្រលប់ទៅផ្ទះខណៈជិះមកដល់មុខណាហ្គាស្រាប់តែមានជនសង្ស័យមួយក្រុមមានគ្នាជាង១០នាក់ជិះម៉ូតូជាច្រើនគ្រឿងបានមកក្បែរហើយបានធ្វើសកម្មភាពធាក់ម៉ូតូប្តួលបំណងប្លន់យកម៉ូតូ។ ស្របពេលនោះក៏មានកម្លាំងសមត្ថកិច្ចល្បាតឃើញទាន់ក៏បានដកកាំភ្លើងបាញ់ចំនួន២គ្រាប់ឡើងលើធ្វើឲ្យក្រុមជនសង្ស័យភ័យជិះម៉ូតូរត់តាំងពីចំណុចកើតហេតុរហូតដល់ចំណុចមុខវត្តកោះ តាមបណ្តោយផ្លូវព្រះមុន្នីវង្សទើបចាប់បាន២នាក់ និងម៉ូតូមួយគ្រឿងម៉ាកឌ្រីមសង់ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ1DB 5649 ចំណែកបក្ខពួកផ្សេងទៀតរត់គេចខ្លួនបាត់។

ក្រោយពេលកើតហេតុជនសង្ស័យទាំង២នាក់រួមទាំងម៉ូតូត្រូវបានសមត្ថកិច្ចយកទៅប៉ុស្តិ៍រដ្ឋបាលនគរបាលចតុមុខធ្វើការសាកសួរ ដើម្បីកសាងសំណុំរឿងទៅអធិការដ្ឋានចាត់ការបន្ត៕

ដោយ៖ ព្រែកជ័យ