នៅល្ងាចថ្ងៃទី 21 ខែកុម្ភៈ ម៉ោងក្នុងស្រុក (ត្រូវនឹងព្រឹកថ្ងៃទី២២ខែកុម្ភៈ) ចំពេលមានភាពតានតឹងពាណិជ្ជកម្មកាន់តែខ្លាំងឡើង បន្ទាប់ពីការកើនឡើងពន្ធលើទំនិញសកលរបស់ប្រធានាធិបតីអាមេរិក Donald Trump ដល់ 15% បារាំងបានអំពាវនាវយ៉ាងឆាប់រហ័សដល់សហភាពអឺរ៉ុប (EU) ឱ្យចាត់វិធានការរួមគ្នាដើម្បីការពារផលប្រយោជន៍របស់ប្លុក មាន 27 ប្រទេស ។
រដ្ឋាភិបាលបារាំងបានអំពាវនាវឱ្យមាន “ការឆ្លើយតបរួមគ្នា និងរឹងមាំ” ពីសហភាពអឺរ៉ុប។ ទីក្រុងប៉ារីសបានសង្កត់ធ្ងន់ថា រដ្ឋជាសមាជិកមិនគួរធ្វើសកម្មភាពជាលក្ខណៈបុគ្គលទេ ប៉ុន្តែត្រូវសម្របសម្រួលដើម្បីមានកម្លាំងចរចាជាមួយសហរដ្ឋអាមេរិក។ បារាំងបានបញ្ជាក់ថា ច្បាប់ដ៏យុត្តិធម៌បំផុតនៅក្នុងពាណិជ្ជកម្មគឺ “ការទៅវិញទៅមក” ហើយបានប្រកាសថា EU នឹងមិនទទួលយកការដាក់ទណ្ឌកម្មដោយការសម្រេចចិត្តឯកតោភាគីពីទីក្រុងវ៉ាស៊ីនតោនឡើយ។
សារព័ត៌មាន AFP បានផ្សាយថា ប្រធានាធិបតីអាមេរិក លោក ដូណាល់ ត្រាំ បានប្រកាសដំឡើងពន្ធគយសកលលើទំនិញ ដែលនាំចូលសហរដ្ឋអាមេរិក ដល់១៥ភាគរយ ក្រោយសន្យាថានឹងនៅតែបន្តសង្រ្គាមពន្ធពាណិជ្ជកម្ម បន្ទាប់ពីតុលាការកំពូលអាមេរិក បានចេញសេចក្តីសម្រេចចាត់ទុកចំណាត់ការពន្ធគយ ដែលរូបលោកបានដាក់ចេញកន្លងមក ជារឿងខុសច្បាប់។
លោក ត្រាំ បានបង្ហោះសារលើបណ្តាញសង្គម Truth Social ថា ក្រោយការត្រួតពិនិត្យហ្មត់ចត់លើការសម្រេចចិត្ត ដែលលោកចាត់ទុកថាមានលក្ខណៈប្រឆាំងអាមេរិក កាលពីថ្ងៃសុក្រដោយតុលាការកំពូល រដ្ឋបាលរបស់លោកនឹងដំឡើងពន្ធនាំចូលដល់អត្រា១៥ភាគរយ។
ដំបូងឡើយ ភ្លាមៗបន្ទាប់ពីតុលាការកំពូលអាមេរិក បានសម្រេចក្នុងសំឡេង៦ទល់នឹង៣ ច្រានចោលសិទ្ធិអំណាចរបស់ប្រធានាធិបតី ក្នុងការដំឡើងពន្ធគយនៅក្រោមច្បាប់ហៅថា IEEPA លោក ត្រាំ បានប្រកាសពន្ធគយសកលថ្មី ក្នុងអត្រា១០ភាគរយ តាមរយៈការប្រើប្រាស់មធ្យោបាយផ្លូវច្បាប់មួយផ្សេងទៀត។
ពន្ធគយថ្មីខាងលើនេះ យោងតាមច្បាប់គឺមានលក្ខណៈបណ្តោះអាសន្នប៉ុណ្ណោះ ដែលអនុញ្ញាតឱ្យត្រឹម១៥០ថ្ងៃ។ បើតាមសេតវិមាន ការលើកលែងគឺនៅមានដដែល សម្រាប់វិស័យនានា ដែលស្ថិតក្រោមការស៉ើបអង្កេតដាច់ដោយឡែក រួមមានដូចជាវិស័យឱសថ និងទំនិញដែលនាំចូលអាមេរិក ក្រោមកិច្ចព្រមព្រៀងត្រីភាគីអាមេរិក-ម៉ិកស៉ិក-កាណាដា ជាដើម។ កាលពីថ្ងៃសុក្រ សេតវិមានបាននិយាយថា បណ្តាដៃគូពាណិជ្ជកម្មរបស់អាមេរិក ដែលបានឈានដល់កិច្ចព្រមព្រៀងពន្ធទ្វេភាគីជាមួយរដ្ឋបាលលោក ត្រាំ ក៏នឹងត្រូវប្រឈមជាមួយ ពន្ធសកលថ្មីនេះផងដែរ៕

រូប​ថត​: AP