ការគោរពអធិបតេយ្យភាព និងបូរណភាពទឹកដី គឺជាគោលការណ៍មូលដ្ឋានមិនអាចចរចាបាន។ ការប៉ះពាល់ ឬការបកស្រាយបញ្ហាព្រំដែនដោយមិនផ្អែកលើឯកសារច្បាប់ និងផែនទីដែលទទួលស្គាល់ជាផ្លូវការ គឺជាការមិនអាចទទួលយកបាន។

ពាក្យមួយបាននិយាយថា «បើមិនលួច ម្ចាស់ក៏មិនប្តឹង»។ ប្រសិនបើគ្មានការរំលោភ ឬសកម្មភាពណាមួយដែលប៉ះពាល់ដល់សិទ្ធិស្របច្បាប់ នោះការតវ៉ា និងការលើកឡើងបញ្ហាក៏មិនកើតមានឡើយ។ ការចោទប្រកាន់ ឬការបដិសេធដោយគ្មានមូលដ្ឋាន មិនអាចលុបបំបាត់ការពិតដែលមានភស្តុតាង និងឯកសារផ្លូវការបានទេ។

គណៈកម្មការវាស់វែងខណ្ឌចែកសីមាព្រំដែនគោក JBC ភាគីកម្ពុជា បានបញ្ជូនកំណត់ទូតជាថ្មីទៅ JBC ភាគីថៃ ដោយស្នើចំនួន ៤ចំណុច ដើម្បីបញ្ជូនក្រុមវាស់វែងចម្រុះ (JSTs) ចុះបន្តអនុវត្តការងារជាអាទិភាពលើដីជាក់ស្តែង ក្នុងអំឡុងខែមីនា ឆ្នាំ២០២៦។ ការងារនេះរួមមានការបន្តបោះបង្គោលព្រំដែនតាមតម្រុយបង្គោលចាស់ និងតាមខ្សែបន្ទាត់ព្រំដែនអន្តរជាតិ ឥណ្ឌូចិន–សៀម ដែលជាមូលដ្ឋានច្បាប់មានសុពលភាព និងត្រូវបានទទួលស្គាល់ជាប្រវត្តិសាស្ត្រ។

ភាគីកម្ពុជា បានអនុវត្តដោយស្មោះត្រង់ និងបន្តប្តេជ្ញាចិត្តក្នុងការដោះស្រាយបញ្ហាតាមយន្តការដែលបានព្រមព្រៀង។ ការពន្យារពេល ឬការមិនឆ្លើយតបយ៉ាងច្បាស់លាស់ នឹងបង្កើនភាពមិនច្បាស់លាស់ និងប៉ះពាល់ដល់ទំនាក់ទំនងរវាង Cambodia និង Thailand។

ព្រំដែនដែលបានកំណត់ត្រឹមត្រូវ គឺជាគ្រឹះសម្រាប់សន្តិភាព និងស្ថេរភាពយូរអង្វែង មិនមែនជាមូលហេតុនៃវិវាទឡើយ។ ការគោរពឯកសារច្បាប់ ការគោរពលទ្ធផលវាស់វែងរួម និងការអនុវត្តតាមកិច្ចព្រមព្រៀង គឺជាកាតព្វកិច្ចដែលត្រូវអនុវត្តដោយទំនួលខុសត្រូវ។

កម្ពុជា បើកទ្វារសម្រាប់ការសហការ ប៉ុន្តែក៏ប្តេជ្ញាដាច់ខាតក្នុងការការពារអធិបតេយ្យភាព និងបូរណភាពទឹកដីរបស់ខ្លួន តាមគ្រប់មធ្យោបាយស្របច្បាប់ និងអន្តរជាតិ។

ការពិតមិនអាចលាក់បានឡើយ។ កិត្តិយស និងភាពជឿជាក់លើឆាកអន្តរជាតិ អាស្រ័យលើការគោរពពាក្យសន្យា និងការអនុវត្តតាមកាតព្វកិច្ចដែលបានព្រមព្រៀងរួចហើយ៕

ដោយ៖លោកតា