ភ្នំពេញ៖ គ្រោះថ្នាក់ចរាចរណ៍បង្កការភ្ញាក់ផ្អើលទាំងព្រឹកដោយសាររថយន្តកុងតឺន័រមួយគ្រឿង បានបើកទៅបុករថយន្តកូរ៉េ ខណៈឆ្លងផ្លូវ នៅចំណុចមុខវិទ្យាល័យជម្ពូវ័ន្ត កាលពីវេលាម៉ោង៤ និង៥០នាទីព្រឹកទាបភ្លឺ ថ្ងៃទី១៥ ខែកញ្ញា ឆ្នាំ២០១៦ តាមបណ្តោយផ្លូវជាតិលេខ៤ សង្កាត់ចោមចៅ ខណ្ឌពោធិ៍សែនជ័យ តែសំណាងល្អគ្មានអ្នករងគ្រោះទេ។

សាក្សីបានឲ្យដឹងថា មុនពេលកើតហេតុ គេបានឃើញរថយន្តកូរ៉េ ពណ៌ខៀវ ពាក់ស្លាកលេខភ្នំពេញ3C-7423 បានបើកចេញពីផ្លូវ រោងចក្រ QMI ទិសដៅពីជើងទៅត្បូងខណៈកំពុងបើកឆ្លងផ្លូវឡើងមកផ្លូវជាតិលេខ៤ស្រាប់តែរថយន្តកុងតឺន័រ មួយគ្រឿងពណ៌ស ពាក់ស្លាកលេខភ្នំពេញ3A-0990 ធ្វើដំណើរតាមបណ្តោយផ្លូវជាតិលេខ៤ក្នុងទិសដៅលិចទៅកើតក្នុងល្បឿនលឿនដោយចាប់ហ្វ្រាំងមិនទាន់ក៏ជ្រុលទៅបុកចំកាប៊ិនមុខពេញទំហឹងបណ្ដាលឲ្យរថយន្តកូរ៉េក្រឡាប់ផ្ងាជើងតែម្តង សំណាងមិនមានអ្នករបួស។

ក្រោយកើតហេតុអ្នកបើករថយន្តទាំង២នាក់ បានរត់គេចខ្លួនអស់បន្សល់រថយន្តនៅកន្លែងកើតហេតុ បណ្តាលឲ្យកកស្ទះចរាចរណ៍ត្រូវបានសមត្ថកិច្ចមូលដ្ឋានសហការជាមួយនគរបាលចរាចរជើងគោករាជធានីធ្វើការវាស់វែងយកទៅរក្សាទុករងចាំម្ចាស់ចូលខ្លួនមកដោះស្រាយ៕

ដោយ៖ សុខាសែនជ័យ