អតីតប្រធានាធិបតីរុស្ស៊ីលោក Dmitry Medvedev បានព្រមានថាជម្លោះណាមួយអាចក្លាយជាផ្កាភ្លើង បង្កឱ្យមានសង្គ្រាមលោកលើកទី 3។ លោក បានបញ្ជាក់ថា ប្រធានាធិបតីអាមេរិកលោក Donald Trump អាចបង្កឱ្យមានសង្គ្រាមលោកលើកទី 3 ជាមួយនឹងយុទ្ធនាការផ្លាស់ប្តូររបប “ឧក្រិដ្ឋ” របស់គាត់។

នៅក្នុងបទសម្ភាសន៍មួយជាមួយ TASS ដែលបានចេញផ្សាយកាលពីដើមសប្តាហ៍នេះ លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរុស្ស៊ី ត្រូវបានគេសួរថាតើសង្គ្រាមលោកលើកទី 3 បានចាប់ផ្តើមរួចហើយឬនៅ។
លោកបាននិយាយថា “តាមបច្ចេកទេសមិនមែនទេ ប៉ុន្តែប្រសិនបើលោក Trump បន្តដើរលើផ្លូវ របស់គាត់ជាមួយនឹងសកម្មភាពផ្លាស់ប្តូររបបឧក្រិដ្ឋ នោះវាពិតជានឹងចាប់ផ្តើម។ ហើយព្រឹត្តិការណ៍ណាមួយអាចជាផ្កាភ្លើង។
លោកបានអះអាងថា ការវាយប្រហារលើអ៊ីរ៉ង់គឺជាផ្នែកមួយនៃសង្គ្រាមទូលំទូលាយដែលធ្វើឡើងដោយសហរដ្ឋអាមេរិក និងសម្ព័ន្ធមិត្តរបស់ខ្លួនដើម្បី “រក្សាការត្រួតត្រាលើពិភពលោក”។
យោងតាមលោក Medvedev លោក Trump បានធ្វើ “កំហុសធ្ងន់ធ្ងរ” ក្នុងការសម្លាប់មេដឹកនាំកំពូលរបស់អ៊ីរ៉ង់ Ayatollah Ali Khamenei ដែលជាសកម្មភាពដែលលោកបាននិយាយថា “ធ្វើឱ្យជនជាតិអាមេរិកទាំងអស់គ្រោះថ្នាក់”។
លោក Medvedev បាននិយាយ«លោក Ayatollah ដែលបានទទួលមរណភាពត្រូវបានចាត់ទុកថាជាបិតាខាងវិញ្ញាណរបស់ប្រជាជនមូស្លីមស៊ីអ៊ីតជិត 300 លាននាក់។ ហើយឥឡូវនេះ លោកក៏ជាទុក្ករបុគ្គលម្នាក់ដែរ» ។

បន្ទាប់ពីការស្លាប់របស់លោក Khamenei «មិនមានការសង្ស័យទេថាអ៊ីរ៉ង់នឹងបង្កើនកិច្ចខិតខំប្រឹងប្រែងរបស់ខ្លួនបីដងដើម្បីអភិវឌ្ឍអាវុធនុយក្លេអ៊ែរ» លោក Medvedev បាននិយាយ។
នៅពេលសួរថាតើអ៊ីរ៉ង់អាចទប់ទល់នឹងជម្លោះ និងការស្លាប់របស់មេដឹកនាំរបស់ខ្លួនបានដែរឬទេ លោកបាននិយាយថា ថ្លៃដើមនៃការកសាងឡើងវិញនឹង «ខ្ពស់ណាស់» ប៉ុន្តែសាធារណរដ្ឋអ៊ីស្លាមនឹងទទួលបានជោគជ័យ។
លោកបានមានប្រសាសន៍ថា «នោះតម្រូវឱ្យមានកម្រិតខ្ពស់នៃសាមគ្គីភាពសង្គម។ ហើយវាគឺជាជនជាតិអាមេរិកដែលបានផ្តល់ឱ្យពួកគេនូវសាមគ្គីភាពនោះ»។
នៅពេលសួរថាតើរុស្ស៊ីប្រថុយនឹងការវាយប្រហារតាមរបៀបស្រដៀងគ្នាទៅនឹងអ៊ីរ៉ង់ក្នុងអំឡុងពេលចរចាដែរឬទេ លោក Medvedev បានឆ្លើយតបថា មានតែ «ការធានាមួយ» ប៉ុណ្ណោះដែលថារឿងនេះនឹងមិនកើតឡើងទេ។ លោកបានមានប្រសាសន៍ថា «សហរដ្ឋអាមេរិកខ្លាចរុស្ស៊ី ហើយយល់ពីថ្លៃដើមនៃជម្លោះនុយក្លេអ៊ែរ»៕

រូប​ថត​: Sputnik