រូបចម្លាក់អាក្រាតកាយរបស់បេក្ខភាពប្រធានាធិបតីមកពីគណបក្សសាធារណរដ្ឋ ដូណាល់ត្រាំ បានបង្ហាញខ្លួនសាជាថ្មីនៅតាមផ្លូវថ្នល់ក្នុងទីក្រុងញូវយ៉កនិង Jersey City កាលពីថ្ងៃទី១៥ ខែកញ្ញា។

បើទោះបីរូបចម្លាក់គ្មានស្លៀកពាក់ខោអាវហើយដៃឱបពោះធ្លាប់បានដាក់បង្ហាញម្តងរួចមកហើយនៅរមណីយដ្ឋានទីក្រុងញូវយ៉កកាលពីខែសីហាក្រោយមកក៏ត្រូវយកចេញទៅបាត់។ នៅពេលនេះរូបចម្លាក់លោកត្រាំបានបង្ហាញខ្លួនជាថ្មីឡើងវិញហើយទទួលបានការចាប់អារម្មណ៍យ៉ាងខ្លាំងពីមហាជន។

កាលពីខែសីហារូបចម្លាក់ខាងលើបានដាក់នៅរមណីយដ្ឋាន Union ក្នុងទីក្រុងញូវយ៉កទទួលបានការចាប់អារម្មណ៍យ៉ាងខ្លាំងដោយមានពលរដ្ឋជាច្រើនទៅថតរូបជាមួយរូបនោះ ។ ប៉ុន្តែប៉ុន្មានម៉ោងក្រោយមក ប៉ូលិសក៏បានយករូបនោះចេញទៅបាត់។

នៅថ្ងៃទី១៥ ខែកញ្ញា លើដងផ្លូវ Holland Tunnel រូបចម្លាក់លោកត្រាំបានបង្ហាញខ្លួនជាថ្មី លើកដំបូងនៅរោងចក្រ RC cola ។ រូបខាងលើមាន៥រូបដូចគ្នាត្រូវបានដាក់នៅក្នុងទីក្រុងចំនួន៥ក្នុងនោះមានញូវយ៉ក, សាន់ហ្វ្រាន់សីុស្កូ, ឡូស អាន់ជឺឡេស, ក្លែវើឡែន និងស៊ីធូលកាលពី ខែសីហា។ តាមគម្រោងរូបចម្លាក់ខាងលើនឹងត្រូវដាក់ដេញថ្លៃនៅក្នុងខែតុលាដើម្បីយកប្រាក់ទៅផ្តល់ជំនួយដល់ជនភៀសខ្លួន ។

រូបចម្លាក់លោកត្រាំបង្ហាញខ្លួនជាថ្មី ក្រោយពេលដែលលោកមានសំឡេងគាំទ្រខ្ពស់ជាងលោកស្រីហ៊ីលឡារី គ្លីនតុន ក្នុងការស្ទង់មតិចុងក្រោយនេះនៅក្នុងពេលឃោសនាបោះឆ្នោតប្រធានាធិបតីអាមេរិកឆ្នាំ២០១៦កំពុងឈានដល់ដំណាក់កាលសំខាន់។ នៅថ្ងៃទី១៤ ខែកញ្ញា លទ្ធផលនៃការស្ទង់មតិថ្មីមួយបានឲ្យឃើញថា បេក្ខភាពដូណាល់ត្រាំ បាននាំមុខលោកស្រីគ្លីនតុននៅក្នុងរដ្ឋ២គឺរដ្ឋណាវ៉ាដា និង អូហៃយ៉ូ ។

លទ្ធផលស្ទង់មតិរបស់ Bloomberg Politics បានបង្ហាញឲ្យឃើញថា មហាសេដ្ឋីត្រាំបាននាំមុខលោកស្រីគ្លីនតុន៥ភាគរយនៅក្នុងរដ្ឋអូហៃយ៉ូ។ ជាក់ស្តែង លោកត្រាំទទួលបាន៤៤ភាគរយសំឡេងគាំទ្រ ចំណែកលោកស្រីគ្លីនតុនមានតែ៣៩ភាគរយប៉ុណ្ណោះ។

នេះជាព័ត៌មានដែលគួរឲ្យបារម្ភសម្រាប់យុទ្ធនាការឃោសនាបោះឆ្នោតរបស់លោកស្រីគ្លីនតុន ដោយសារតែរដ្ឋអូហៃយ៉ូជាភូមិសាស្ត្រយុទ្ធសាស្ត្ររបស់អាមេរិកហើយក្នុងប្រវត្តិសាស្ត្របេក្ខភាព១០រូបបានក្លាយជាប្រធានាធិបតីក្រោយពេលទទួលបានសំឡេងគាំទ្រភាគច្រើននៅក្នុងរដ្ឋនេះ។

ជាមួយគ្នានោះរដ្ឋណាវ៉ាដា លោក ដូណាល់ ត្រាំក៏នាំមុខលោកស្រីគ្លីនតុន២ភាគរយផងដែរ ដោយមានសំឡេងគាំទ្រលោកត្រាំ៤៤ភាគរយ ចំណែកលោកស្រីគ្លីនតុនវិញទទួលបានសំឡេងគាំទ្រតែ៤២ភាគរយប៉ុណ្ណោះ៕

ប្រែសម្រួល៖ ម៉ែវ សាធី