ប្រធានបាល់ទាត់ជាតិអ៊ីរ៉ង់(FFIRI) លោក Mehdi Taj បាននិយាយកាលពីថ្ងៃពុធថា ក្រុមជម្រើសជាតិអ៊ីរ៉ង់កំពុងបន្តរៀបចំខ្លួនសម្រាប់ការប្រកួត World Cup ហើយមិនមានចេតនាដកខ្លួនចេញពីការប្រកួតនោះទេ ប៉ុន្តែពួកគេនឹងមិនធ្វើដំណើរទៅកាន់សហរដ្ឋអាមេរិកឡើយ។
អ៊ីរ៉ង់គឺជាប្រទេសមួយក្នុងចំណោមប្រទេសដំបូងគេដែលមានកៅអីសម្រាប់វគ្គ48ក្រុមចុងក្រោយ ប៉ុន្តែការចូលរួមរបស់ពួកគេបានស្ថិតក្នុងភាពស្រពិចស្រពិលចាប់តាំងពីជម្លោះរវាងសាធារណរដ្ឋអ៊ីស្លាម និងសហរដ្ឋអាមេរិកបានចាប់ផ្តើមនៅចុងខែកុម្ភៈ។
ការប្រកួតចាប់ផ្តើមពីថ្ងៃទី 11 ខែមិថុនា ដល់ថ្ងៃទី 19 ខែកក្កដា ហើយនឹងប្រព្រឹត្តទៅនៅសហរដ្ឋអាមេរិក ម៉ិកស៊ិក និងកាណាដា។
ក្រុមជម្រើសជាតិអ៊ីរ៉ង់ គ្រោងនឹងលេងការប្រកួតបើកឆាកពូលទាំងបីរបស់ពួកគេនៅសហរដ្ឋអាមេរិក ប៉ុន្តែ លោក Taj បាននិយាយកាលពីថ្ងៃចន្ទថា FFIRI របស់អ៊ីរ៉ង់កំពុងចរចាជាមួយ FIFA ដើម្បីឲ្យពួកគេផ្លាស់ទៅម៉ិកស៊ិក។ អ៊ីរ៉ង់នឹងប្រកួតជាមួយនីហ្សេរីយ៉ានៅថ្ងៃទី 27 ខែមីនា និងកូស្តារីកា បួនថ្ងៃក្រោយមកនៅ Antalya ដែលជាផ្នែកមួយនៃការប្រកួតអញ្ជើញប្រទេសចំនួន 4 ដែលត្រូវផ្លាស់ប្តូរពីប្រទេសហ្ស៊កដានី ដោយសារជម្លោះនៅមជ្ឈិមបូព៌ា។
លោក Taj បាននិយាយកាលពីថ្ងៃពុធ ខណៈដែលលោកបានស្វាគមន៍កីឡាការិនីមកពីក្រុមជម្រើសជាតិ ត្រឡប់ទៅប្រទេសអ៊ីរ៉ង់វិញនៅឯព្រំដែនឆ្លងពីប្រទេសទួរគី បន្ទាប់ពីការធ្វើដំណើរដ៏យូររបស់ពួកគេពីប្រទេសអូស្ត្រាលី។
ប្រធានាធិបតីម៉ិកស៊ិក Claudia Sheinbaum បាននិយាយកាលពីថ្ងៃអង្គារថា ប្រទេសរបស់លោកស្រីនឹងបើកចំហស្វាគមន៍សម្រាប់ការប្រកួត World Cup របស់អ៊ីរ៉ង់ទល់នឹងនូវែលសេឡង់ បែលហ្សិក និងអេហ្ស៊ីបក្នុងខែមិថុនា ប៉ុន្តែការសម្រេចចុងក្រោយអំពីការប្តូរទីកន្លែងណាមួយនឹងក្លាយជាកិច្ចការរបស់ FIFA ៕
