មេដឹកនាំកូរ៉េខាងជើងលោក គីមជុងអ៊ុន បានបន្តផ្ញើសារគាំទ្រយ៉ាងខ្លាំងដល់ប្រទេសរុស្ស៊ី ដោយបញ្ជាក់ថាទីក្រុងព្យុងយ៉ាងនឹង «គាំទ្រជានិច្ចចំពោះទីក្រុងមូស្គូ»។ សេចក្តីថ្លែងការណ៍នេះកើតឡើងចំពេលមានទំនាក់ទំនងនយោបាយ និងយោធាកាន់តែជិតស្និទ្ធរវាងប្រទេសទាំងពីរ។

យោងតាមទីភ្នាក់ងារសារព័ត៌មានកណ្តាលកូរ៉េ (KCNA) នៅថ្ងៃទី 25 ខែមីនា បានផ្សាយថា នៅក្នុងលិខិតមួយផ្ញើទៅកាន់ប្រធានាធិបតីរុស្ស៊ីលោកវ្ល៉ាឌីមៀពូទីន លោកគីមជុងអ៊ុនបានសម្តែងទំនុកចិត្តថាទំនាក់ទំនងដែលផ្អែកលើ «ទំនុកចិត្ត និងចំណងមិត្តភាពជិតស្និទ្ធ» រវាងមេដឹកនាំទាំងពីរនឹងធានាអនាគតសហប្រតិបត្តិការរយៈពេលវែង ខណៈពេលដែលលើកកម្ពស់ការអភិវឌ្ឍ និងសុខុមាលភាពសម្រាប់ប្រជាជននៃប្រទេសទាំងពីរ។
លោកបានសង្កត់ធ្ងន់ថាការឈរជើងរបស់កូរ៉េខាងជើងនៅខាងរុស្ស៊ីគឺជា «ជម្រើស និងឆន្ទៈដ៏រឹងមាំ» របស់ទីក្រុងព្យុងយ៉ាង។
ការប្រកាសនេះកើតឡើងនៅពេលដែលលោកគីមជុងអ៊ុនទើបតែត្រូវបានជ្រើសតាំងឡើងវិញជាប្រធានគណៈកម្មការកិច្ចការរដ្ឋនៃប្រទេសកូរ៉េខាងជើង – ស្ថាប័នធ្វើគោលនយោបាយខ្ពស់បំផុតរបស់ប្រទេស – សម្រាប់អាណត្តិទីបីជាប់ៗគ្នាចាប់តាំងពីការបង្កើតឡើងក្នុងឆ្នាំ ២០១៦។
ពីមុន លោកពូទីនក៏បានផ្ញើសារអបអរសាទរ និងបានសម្តែងក្តីសង្ឃឹមរបស់លោកថាប្រទេសទាំងពីរនឹងបន្តពង្រឹងកិច្ចសហប្រតិបត្តិការក្នុងក្របខ័ណ្ឌនៃភាពជាដៃគូយុទ្ធសាស្ត្រដ៏ទូលំទូលាយរបស់ពួកគាត់។
លោកគីមបានសរសេរនៅក្នុងលិខិតថា “ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះអ្នកដែលបានផ្ញើការអបអរសាទរយ៉ាងកក់ក្តៅចំពោះការតែងតាំងឡើងវិញរបស់ខ្ញុំទៅកាន់តំណែងជាប្រធានគណៈកម្មការកិច្ចការរដ្ឋ”។
ទំនាក់ទំនងកូរ៉េខាងជើង-រុស្ស៊ីល្អប្រសើគួរឱ្យកត់សម្គាល់ចាប់តាំងពីទីក្រុងមូស្គូបានចាប់ផ្តើមយុទ្ធនាការយោធារបស់ខ្លួននៅអ៊ុយក្រែនក្នុងឆ្នាំ ២០២២។
យោងតាមប្រភពស៊ើបការណ៍សម្ងាត់កូរ៉េខាងត្បូង និងលោកខាងលិច ទីក្រុងព្យុងយ៉ាងបានដាក់ពង្រាយកងទ័ពរាប់ពាន់នាក់ទៅកាន់ប្រទេសរុស្ស៊ី ជាពិសេសនៅក្នុងតំបន់ Kursk ហើយក៏បានផ្គត់ផ្គង់កាំភ្លើងធំ មីស៊ីល និងប្រព័ន្ធមីស៊ីលរយៈចម្ងាយឆ្ងាយផងដែរ។ ជាថ្នូរនឹងការនេះ រុស្ស៊ីត្រូវបានគេជឿថាបានផ្តល់បច្ចេកវិទ្យាស្បៀងអាហារ និងអាវុធដល់កូរ៉េខាងជើង។ ប្រទេសទាំងពីរក៏បានចុះហត្ថលេខាលើសន្ធិសញ្ញាការពារជាតិទៅវិញទៅមកក្នុងខែមិថុនា ឆ្នាំ ២០២៤ ដោយសន្យាថានឹងគាំទ្រយោធា “ភ្លាមៗ” ប្រសិនបើភាគីណាមួយត្រូវបានវាយប្រហារ។
ស្របនឹងការពង្រឹងទំនាក់ទំនងជាមួយរុស្ស៊ី កូរ៉េខាងជើងក៏កំពុងពង្រីកទំនាក់ទំនងជាមួយដៃគូផ្សេងទៀតផងដែរ។ ប្រព័ន្ធផ្សព្វផ្សាយរដ្ឋកូរ៉េខាងជើងបានរាយការណ៍ថា មេដឹកនាំវៀតណាម និងបេឡារុសបានផ្ញើសារអបអរសាទរទៅកាន់លោកគីម ចំពោះការបោះឆ្នោតឡើងវិញរបស់លោក។ ប្រធានាធិបតីបេឡារុស លោកអាឡិចសាន់ឌឺ លូកាសេនកូ ក៏ត្រូវបានគេរំពឹងថានឹងធ្វើទស្សនកិច្ចទីក្រុងព្យុងយ៉ាង ដើម្បីពង្រឹងកិច្ចសហប្រតិបត្តិការទ្វេភាគីផងដែរ៕

រូប​ថត​: KCNA