ភ្នំពេញ៖ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីក្នុងពិធីបើក «ការតាំងពិព័រណ៍ផលិតផលខ្មែរ លើកទី៣» ក្រោមប្រធានបទ «រួមគ្នាផលិត រួមគ្នាប្រើផលិតផលជាតិ» ដែលរៀបចំដោយសម្ព័ន្ធសមាគមសហគ្រាសធុនតូចនិងមធ្យមកម្ពុជា(FASMEC) នៅកោះពេជ្រ នាល្ងាចថ្ងៃទី៩ ខែមេសា ឆ្នាំ២០២៦ ម្សិលមុិញ។

សូមបញ្ជាក់ថា ៖ ផលិតផលទាំងអស់ដែលត្រូវដាក់បង្ហាញ សុទ្ធសឹងមានគុណភាព សុវត្ថិភាព និងការទទួលស្គាល់ពី ស្ថាប័នជំនាញច្បាស់លាស់។ មិនត្រឹមប៉ុណ្ណឹងទេ ពិព័រណ៍នេះក៏មានវេទិកាផ្គូរផ្គង់ ពាណិជ្ជកម្ម រវាងអ្នក ផលិត និងអ្នកចែកចាយផងដែរ។ លោក តែ តាំងប៉ បានថ្លែងដូច្នេះថា៖«ឥឡូវនេះ ផលិតផលខ្មែរកំពុងស្ទុះឡើង ដែលយើងនឹកស្មានអត់ដល់។ ដូច្នេះបានជាខ្ញុំប្រឹងប្រែងរៀបចំពិព័រណ៍ឱ្យបានមុនចូលឆ្នាំ ដើម្បីធ្វើយ៉ាងណា ឱ្យពលរដ្ឋយើងអាចទិញសម្ភារៈ ដែលជាផលិតផលខ្មែរទៅស្រុកកំណើត»។

 

ចលនាគាំទ្រ និងពហិកាផលិតផលថៃ បានជួយវិស័យសហគ្រាសធុនតូច និងមធ្យម (SMEs) ឱ្យមានសន្ទុះឡើងវិញ។ បច្ចុប្បន្ន «ផលិតផលក្នុងស្រុក» បានចាក់បញ្ចូលទីផ្សាររហូតដល់ ៣០ ភាគរយ នៃបរិមាណផលិតផលសរុបដែលកំពុងចរាចរ ។

អ្វីជាមោទភាព ! ក្នុងកម្មវិធីបើកតាំងពិពណ៍នេះ លោកស្រី អគ្គនាយិកា ហង់ វុត្ថា ព្រមទាំង លោក ម៉ៅ មីន ប្រធានក្រុមប្រឹក្សាភិបាល នៃក្រុមហ៊ុនស្នាដៃនារីខ្មែរ បានអញ្ជើញចូលរួមកម្មវិធី តាំងពិព័រណ៌ផលិតផលខ្មែរ លើកទី៣

ក្រោមប្រធានបទ «រួមគ្នាផលិត រួមគ្នាប្រើផលិតផលជាតិ» នឹងទទួលបានគ្រឿងឥស្សរិយយស ពីលោកឧបនាយករដ្ឋមន្ត្រី វង្សី វិស្សុត ។ មានន័យថា ៖ ស្ថិតក្នុងថ្ងៃដល់មានសិរីសួស្តីនោះ លោកទាំងពីរ មានមហាកិត្តិយសបំផុត ក្នុងការទទួលបានគ្រឿងឥស្សរិយយស (មេដាយកិត្តិយស) ដែលបំពាក់ ដោយលោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយ ៖ សិលា