ខេត្តកំពង់ស្ពឺ÷ដោយមានការបញ្ជាផ្ទាល់ពីលោកឧត្តមសេនីយ៍ទោ ឃឹម សុខខៃ ស្នងការនគរបាលខេត្តកំពង់ស្ពឺ- លោកវរសេនីយ៍ទោ យ័ន្ត សង្ហា អធិការដ្ឋាននគរបាលក្រុងច្បារមន ដឹកនាំផ្នែកយុត្តិធម៌ក្រុងច្បារមនបានសហការកម្លាំងប៉ុស្តិ៍នគរបាលសង្កាត់រការធំ បានធ្វើការឃាត់ខ្លួនក្មេងទំនើងចំនួន ០១ នាក់។
មន្ត្រីនគរបាលក្រុងច្បារមនបានឱ្យដឹងថា នៅថ្ងៃទី១២ ខែមេសា ឆ្នាំ២០២៦ វេលាម៉ោង ០៩:៣០ នាទី កម្លាំងផ្នែកយុត្តិធម៌សហការជាមួយ កម្លាំងប៉ុស្ដិរការធំ បានស្រាវជ្រាវឃាត់ខ្លួនក្មេងទំនើង១ នាក់ឈ្មោះ ភិន ស៊ីងថុង ភេទប្រុស អាយុ ២១ឆ្នាំ រស់នៅភូមិទួលសំណាង ឃុំវល្លិ៍ស ស្រុកសំរោងទង ខេត្តកំពង់ស្ពឺ មុខរបរកម្មកររោងចក្រ (អ្នកបង្ហោះម៉ូតូ) ដែលពាក់ព័ន្ធក្នុងករណី បង្ហោះម៉ូតូ ដែលប្រជាពលរដ្ឋ ថតបានបង្ហោះតាម (Facebook) ។
ក្រោយធ្វើការសាកសួរ ឈ្មោះភិន ស៊ីងថុង បានឆ្លើយសារភាពថា ពិតជាបានធ្វើសកម្មភាព បង្ហោះម៉ូតូ ម៉ាកហុងដា ឌ្រីម សេ១២៥ ពណ៌ខ្មៅ សេរីឆ្នាំ២០២៥ ពាក់ស្លាកលេខ កំពង់ស្ពឺ ១z- ៨២១៤នៅចំណុចតាមដងផ្លូវជាតិលេខ០៤ ស្ថិតនៅក្នុងភូមិស្នោទី១ សង្តាត់រការធំ ក្រុងច្បារមន ខេត្តកំពង់ស្ពឺ កាលពីថ្ងៃទី១០ ខែមេសា ឆ្នាំ២០២៦ វេលាម៉ោង១១:៣០ នាទី ពិតប្រាកដមែន ។
នគរបាលក្រុងច្បារមនបានហៅអាណាព្យាបាល មកទទួលដឹងឮ និងអប់រំ និងធានាយកកូនទៅត្រឡប់ទៅលំនៅដ្ឋានវិញ និងដកហូត ម៉ូតូរក្សាទុកនៅអធិការដ្ឋាន រយៈពេល៣ ខែ៕
