មេដឹកនាំកូរ៉េខាងជើង លោក គីម ជុងអ៊ុន បានត្រួតពិនិត្យការបាញ់សាកល្បងមីស៊ីលយុទ្ធសាស្ត្រ និងមីស៊ីលប្រឆាំងនាវាដែលបាញ់ចេញពីនាវាពិឃាត Choe Hyon របស់កងទ័ពជើងទឹក ដើម្បីវាយតម្លៃភាពត្រឹមត្រូវ និងប្រសិទ្ធភាពនៃអាវុធទាំងនោះ។

នៅថ្ងៃទី១៤ ខែមេសា ទីភ្នាក់ងារសារព័ត៌មានរដ្ឋកូរ៉េខាងជើង (KCNA) បានរាយការណ៍ថា មេដឹកនាំ គីម ជុងអ៊ុន បានត្រួតពិនិត្យការបាញ់សាកល្បងមីស៊ីលយុទ្ធសាស្ត្រ និងមីស៊ីលប្រឆាំងនាវាដែលបាញ់ចេញពីនាវាពិឃាត Choe Hyon របស់កងទ័ពជើងទឹក។
ការបាញ់សាកល្បងទាំងនេះ ដែលបានធ្វើឡើងនៅថ្ងៃទី១២ ខែមេសា មានគោលបំណងសាកល្បងសមត្ថភាពប្រតិបត្តិការនៃប្រព័ន្ធបញ្ជាអាវុធរួមបញ្ចូលគ្នារបស់នាវា និងដើម្បីវាយតម្លៃភាពត្រឹមត្រូវ និងប្រសិទ្ធភាពនៃប្រព័ន្ធណែនាំប្រឆាំងនឹងការកកស្ទះដែលបានធ្វើឱ្យប្រសើរឡើង។
យោងតាម KCNA មីស៊ីលយុទ្ធសាស្ត្រពីរគ្រាប់ និងមីស៊ីលប្រឆាំងនាវាចំនួនបីគ្រាប់ ត្រូវបានបាញ់ចេញពីនាវា Choe Hyon ដោយហោះតាមគន្លងដែលបានកំណត់ទុកជាមុន និងវាយប្រហារគោលដៅរបស់ពួកគេដោយ “ភាពត្រឹមត្រូវខ្ពស់បំផុត”។
នៅថ្ងៃដដែលនោះ មេដឹកនាំ គីម ជុងអ៊ុន ក៏បានទទួលរបាយការណ៍មួយស្តីពីផែនការដាក់ពង្រាយប្រព័ន្ធអាវុធនៅលើនាវាពិឃាតដែលកំពុងសាងសង់ផងដែរ។ មេដឹកនាំ គីម ជុងអ៊ុន បានសង្កត់ធ្ងន់ថា ការរីកចម្រើនថ្មីៗក្នុងវិទ្យាសាស្ត្រការពារជាតិ បានរួមចំណែកដល់ការបង្កើនសមត្ថភាពរបស់យោធាកូរ៉េខាងជើង និងបានបញ្ជាក់ពីការប្តេជ្ញាចិត្តក្នុងការពង្រឹងសមត្ថភាពការពារជាតិបន្ថែមទៀត៕