ខេត្តបន្ទាយមានជ័យ៖ សាកសពម្នាក់ត្រូវបានគេប្រទះឃើញស្លាប់នៅក្នុងប្រឡាយទឹកនាវេលាម៉ោង4និង10នាទីរសៀលថ្ងៃទី 19 ខែមេសា ឆ្នាំ2026  ស្ថិតនៅក្នុងភូមិទួលប្រាសាទ ឃុំទួលពង្រ ស្រុកម៉ាឡៃ ។

លោក បេន  សំអាត អធិការនគរបាលស្រុកម៉ាឡៃ បានឲ្យដឹងថា សាកសពសល់តែគ្រោងឆ្អឹង មិនស្គាល់អត្តសញ្ញាណ ស្លៀកខោជើងវែងពណ៌ខ្មៅ។

លោកអធិការបានបញ្ជាក់ថា ឆ្លងតាមការបំភ្លឺរបស់ឈ្មោះ នួន សា ភេទប្រុស អាយុ18ឆ្នាំ (ជាអ្នករស់នៅភូមិកើតហេតុខាងលើបានបញ្ជាក់ថា នៅអំឡុងខែមីនា ឆ្នាំ2026 វេលាម៉ោង12យប់ខ្ញុំបាទកំពុងនៅផ្ទះដែលស្ថិតនៅក្នុងភូមិកើតហេតុខាងលើ ស្រាប់តែបានឃើញមនុស្សអនាថាម្នាក់សម្បុរខ្មៅ សក់ខ្លី ស្លៀកខោជើងវែងពណ៌ខ្មៅ អត់មានពាក់អាវទេដើរតាមផ្លូវតែម្នាក់ឯង មិនស្គាល់អត្តសញ្ញាណទេ រួចមកសុំទឹកខ្ញុំផឹក។ ដោយឃើញមានស្ថានភាពស្រវឹងខ្លាំងពេលនោះគាត់បានផឹកទឹករួច ក៏ដើរសំដៅទៅផ្លូវជាតិលេខ59 ខាងមុខទៀត ហើយក៏បាត់តាំងពីពេលនោះមក លុះមកដល់ថ្ងៃទី19 ខែមេសា ឆ្នាំ2026 វេលាម៉ោងប្រហែល4រសៀលខ្ញុំបាទក៏ឮថាមានមនុស្សស្លាប់ក្នុងប្រឡាយ ខ្ញុំក៏នាំគ្នាទៅមើលឃើញភិនភាគសពដូចមនុស្សដើរអនាថាសុំទឹកផឹកកាលពីខែមុន។ លោក បេន  សំអាត បានបញ្ជាក់ទៀតថា ដោយមានការសម្របសម្រួលពីឯកឧត្តម កើត វណ្ណារ៉េតព្រះរាជអាជ្ញាអមសាលាដំបូងខេត្ត នៅម៉ោង១៦និង៣៤នាទី ថ្ងៃទី១៩ ខែមេសា ឆ្នាំ២០២៦ បានពិនិត្យសពទទួលបានលទ្ធផលដូចខាងក្រោម:

-ផ្នែកក្បាល: ពុំមានស្លាកស្នាមអ្វីគួរឲ្យកត់សម្គាល់នោះទេ ។

-ផ្នែកដងខ្លួនសល់តែគ្រោងឆ្អឹងនិងស្បែកបន្តិច។

-ផ្នែកអវៈយវៈ ពុំមានស្លាកស្នាមអ្វីគួរឲ្យកត់សម្គាល់នោះទេ (បាត់ឆ្ងឹងដៃស្តាំម្ខាង សង្ស័យសត្វអូស)។ តាមការសន្និដ្ឋានពីលោកគ្រូពេទ្យកោសល្យវិច័យ ការពិនិត្យយ៉ាងល្អិតល្អន់របស់មន្ត្រីជំនាញ និងតាមការបំភ្លឺពីសាក្សី ព័ត៌មានប្រមូលបាន យើងសន្និដ្ឋានបឋមថា ជនរងគ្រោះសង្ស័យស្លាប់ដោយសារខ្វះអាហារូបត្ថម្ភ។ សាកសពបានបូជានៅនឹងកន្លែង រួចប្រគល់ជូនអនុភូមិយកទៅធ្វើបុណ្យតាមប្រពៃណី (រក្សាទុកធាតុនៅវត្ត) ៕

ដោយ៖ វណ្ណា