ការលេចធ្លាយសារធាតុគីមីអំឡុងពេលសម្អាតនៅរោងចក្រកែច្នៃប្រាក់មួយកន្លែងនៅរដ្ឋ West Virginia បានបង្កឱ្យមានប្រតិកម្មគីមីដ៏ខ្លាំងមួយ ដោយបានសម្លាប់មនុស្សពីរនាក់ និងរបួស 30 នាក់ផ្សេងទៀត។

ក្នុងពេលដែលកម្មករកំពុងរៀបចំបិទផ្នែកមួយនៃរោងចក្រកែច្នៃប្រាក់ Catalyst Refiners នៅ នៅថ្ងៃទី 22 ខែមេសា ដើម្បីសម្អាត អាស៊ីតនីទ្រីក និងសារធាតុគីមីមួយទៀតបានលេចធ្លាយ និងមានប្រតិកម្ម ដែលបង្កើតជាឧស្ម័ន H2S ដែលមានជាតិពុលខ្ពស់ នេះបើយោងតាមលោក C. W. Sigman ប្រធានទីភ្នាក់ងារគ្រប់គ្រងគ្រោះមហន្តរាយខោនធី Kanawha នៅរដ្ឋ West Virginia។
លោក Sigman បាននិយាយថា “នេះគឺជាប្រតិកម្មគីមីដ៏ខ្លាំង ដែលស្ទើរតែមិនអាចគ្រប់គ្រងបានភ្លាមៗ”។ “ការចាប់ផ្តើម និងចុងបញ្ចប់នៃដំណើរការប្រតិកម្មគីមីគឺជាពេលវេលាដ៏គ្រោះថ្នាក់បំផុត”។
ហេតុការណ៍នេះបានបណ្តាលឱ្យមានមនុស្សស្លាប់ពីរនាក់ និងរបួស 30 នាក់ ដែលត្រូវការសម្រាកព្យាបាលនៅមន្ទីរពេទ្យ រួមទាំងគ្រូពេទ្យសង្គ្រោះបន្ទាន់ចំនួនប្រាំពីរនាក់ ដែលត្រូវបានបញ្ជូនទៅកន្លែងកើតហេតុ។ មនុស្សម្នាក់ស្ថិតក្នុងស្ថានភាពធ្ងន់ធ្ងរ។
ក្រៅពីអ្នកដែលត្រូវបានដឹកជញ្ជូនតាមរថយន្តសង្គ្រោះបន្ទាន់ អ្នកខ្លះបានទៅមន្ទីរពេទ្យក្នុងរថយន្តផ្ទាល់ខ្លួនរបស់ពួកគេ ហើយអ្នកខ្លះថែមទាំងត្រូវដឹកជញ្ជូនទៅមន្ទីរពេទ្យក្នុងស្រុកដោយរថយន្តដឹកសំរាមទៀតផង។ អ្នកជំងឺបានបង្ហាញរោគសញ្ញាផ្លូវដង្ហើមដូចជា ក្អក ដង្ហើមខ្លី ឈឺបំពង់ក និងឈឺភ្នែក។

បន្ទាប់ពីហេតុការណ៍នេះ អាជ្ញាធរបានចេញបទបញ្ជាមួយដែលតម្រូវឱ្យប្រជាជននៅក្នុងតំបន់ជុំវិញរោងចក្រស្នាក់នៅក្នុងផ្ទះ។ បទបញ្ជានេះត្រូវបានលុបចោលនៅម៉ោង ៥ ល្ងាចថ្ងៃដដែលនោះ៕

រូប​ថត​:vnexpress