ខេត្តបាត់ដំបង÷ កម្លាំងកងរាជអាវុធហត្ថស្រុកសំពៅលូន សហការជាមួយកម្លាំងអធិការដ្ឋាននគរបាលស្រុកភ្នំព្រឹក ដឹកនាំដោយលោកអនុសេនីយ៍ឯក លាង សុខលី មេបញ្ជាការចុះល្បាត បានឃាត់ខ្លួនបុរសម្នាក់ដែលប្រើល្បិចដើរលក់ចិញ្ចៀនកាឡៃថាជាប្លាទីន បោកប្រាស់ប្រជាពលរដ្ឋយកប្រាក់ ។
សេចក្តីរាយការណ៍បានឱ្យដឹងថា កាលពីវេលាម៉ោង ១៨:៣០នាទី ថ្ងៃទី៣០មេសា នៅត្រង់ចំណុចក្រុមទី១៣ ភូមិគីឡូ១៣ ឃុំសន្តិភាព ស្រុកសំពៅលូន មានករណីឆបោកមួយបានកើតឡើង បង្កដោយជនសង្ស័យឈ្មោះ ហេង សម្បត្តិ ភេទប្រុស អាយុ៥៤ឆ្នាំ មុខរបរអ្នកសារព័ត៌មាន រស់នៅភូមិធំ ឃុំឈ្វាំង ស្រុកពញាឮ ខេត្តកណ្ដាល ។
ជនសង្ស័យបានជិះម៉ូតូម៉ាក Suzuki Viva ពណ៌ខ្មៅ ស្លាកលេខ ៥៥ ៦២ ធ្វើសកម្មភាពដើរលក់ចិញ្ចៀនកាឡៃ ដោយភូតកុហកជនរងគ្រោះថាជាប្លាទីន។ ក្នុងនោះមានជនរងគ្រោះចំនួន ០២នាក់ បានចាញ់បោកទិញអស់ប្រាក់សរុបជាង ១,៥លានរៀល ។
វត្ថុតាងដែលសមត្ថកិច្ចដកហូតបាន រួមមាន៖
ម៉ូតូ ០១គ្រឿង, អាយកូម ០២គ្រឿង, ទូរសព្ទ ០២គ្រឿង, នាឡិកា ០១គ្រឿង និងចិញ្ចៀន ០៣វង់ ។
ជនសង្ស័យត្រូវបានឃាត់ខ្លួននៅបញ្ជាការដ្ឋានកងរាជអាវុធហត្ថស្រុកសំពៅលូន ដើម្បីកសាងសំណុំរឿងបញ្ជូនទៅការិយាល័យជំនាញចាត់ការបន្តតាមច្បាប់ ៕
ដោយ៖ សុរិយា
