ក្រុម Johor Darul Ta’zim FC បានតាមស្មើកំណត់ត្រាពិភពលោកសម្រាប់ការប្រកួតមិនដែលចាញ់យូរបំផុតក្នុងលីគជាតិបន្ទាប់ពីយកឈ្នះ Kelantan ក្នុងការប្រកួតចុងក្រោយនៃក្របខណ្ឌបាល់ទាត់ Malaysia Super League (MSL)។

 

ជ័យជម្នះនៅថ្ងៃទី 10 ខែឧសភា មានន័យថា JDT បានបញ្ចប់រដូវកាលដោយគ្មានការចាញ់ក្នុងការប្រកួត 24 លើក។ នេះបង្កើនការមិនដែលស្គាល់ចាញ់ នៅMSL របស់ពួកគេដល់ 108ប្រកួត ដែលស្មើនឹងកំណត់ត្រាពិភពលោកដែលកំណត់ដោយក្លឹប Ivory Coast ASEC Mimosas ចន្លោះឆ្នាំ 1989 និង 1994 ។

 

ក្លឹប Johor ក៏បានបញ្ចប់រដូវកាលនេះជាមួយនឹងការលេងយ៉ាងល្អជានិមិត្តរូបនៃការគ្រប់គ្រងក្នុងស្រុករបស់ពួកគេ ដោយបានយកឈ្នះ Kelantan 14-1 ។ នេះជាការទទួលជ័យជម្នះដ៏ធំបំផុតក្នុងប្រវត្តិសាស្ត្រ MSL លើសកំណត់ត្រារបស់ JDT ឈ្នះ 10-0 ទល់នឹង DPMM ក្នុងខែតុលា ឆ្នាំ 2025។

 

ខ្សែប្រយុទ្ធប្រេស៊ីល Bergson Da Silva ស៊ុតបញ្ចូលទីបាន 6 គ្រាប់ក្នុងការប្រកួតចុងក្រោយ ខណៈដែល Manuel Hidalgo ស៊ុតបានបីគ្រាប់។ Antonio Glauder, Stuart Wilkin, Yago Cesar, Syamer Kutty Abba និង Alberto Diaz ម្នាក់ៗបានចូលរួមចំណែកមួយគ្រាប់។ Kelantan រកបានតែគ្រាប់បាល់លួងចិត្តនៅនាទីទី 64 ។

 

JDT បានបញ្ចប់រដូវកាលដោយមាន 70 ពិន្ទុ ដោយស៊ុតបញ្ចូលទីបាន 116 គ្រាប់ និងរបូតវិញត្រឹមតែ 10 ។ Kelantan បានបញ្ចប់ក្នុងចំណាត់ថ្នាក់លេខ 2 បាតតារាងដែលមាន 15 ពិន្ទុ។

 

ការមិនដែលចាញ់របស់ JDT មានរយៈពេលជាងបួនឆ្នាំ។ ការចាញ់ MSL ចុងក្រោយរបស់ពួកគេគឺចាញ់ 0-1 ក្រោមស្នាដៃក្រុម Terengganu ក្នុងខែមេសា ឆ្នាំ 2021។

 

ពួកគេបានឈ្នះពានរង្វាន់ MSL រយៈពេល 12 រដូវកាលជាប់ៗគ្នា ដែលជារយៈពេលដ៏យូរបំផុតមួយនៃការគ្រប់គ្រងបាល់ទាត់អាស៊ី។

 

ក្លឹបបានទទួលជ័យជម្នះជាច្រើនដែលជាមធ្យមជិត៥គ្រាប់ក្នុងមួយប្រកួតក្នុងរដូវកាលនេះ។ លើសពីការវាយលុកប្រកបដោយគុណភាពជាមួយនឹងកីឡាករបរទេសដែលមានកេរ្តិ៍ឈ្មោះខ្ពស់ជាច្រើន JDT ក៏មានភាពខ្លាំងផ្នែកការពារដែលត្រូវគេស៊ុតបញ្ចូលទីបានត្រឹមតែ 10 គ្រាប់ពេញមួយរដូវកាល។

 

ក្លឹបJDT អាចបំបែកកំណត់ត្រាពិភពលោកក្នុងការប្រកួតដំបូងរបស់ពួកគេនៃរដូវកាល MSL 2026-2027៕