កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានរាយការណ៍ពីការផ្ទុះចំនួនបីនៅក្នុងទីក្រុងកំពង់ផែ Bandar Abbas នៅព្រឹកព្រលឹមនេះ ដោយសង្កត់ធ្ងន់ថា ប្រព័ន្ធការពារដែនអាកាស “ត្រូវបានធ្វើឱ្យសកម្មដើម្បីទប់ទល់នឹងគោលដៅសត្រូវ”។ វីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមបានបង្ហាញពីគ្រាប់កាំភ្លើងធំប្រឆាំងយន្តហោះ និងផ្លូវមីស៊ីលជាច្រើននៅលើមេឃទីក្រុង។

ទីភ្នាក់ងារសារព័ត៌មាន Fars របស់អ៊ីរ៉ង់បានដកស្រង់សម្តីសាក្សីដែលនិយាយថា ការផ្ទុះជាច្រើនបានកើតឡើងនៅលើឈូងសមុទ្រពែរ្ស។ កងកម្លាំងប្រដាប់អាវុធអ៊ីរ៉ង់ពីមុនបានប្រកាសថា ពួកគេបានបំផ្លាញ “យន្តហោះគ្មានមនុស្សបើករបស់សត្រូវ” ដែលគេជឿថាជាយន្តហោះ MQ-9 Reaper នៅក្នុងតំបន់នោះ។
លោក Timothy Hawkins អ្នកនាំពាក្យនៃបញ្ជាការកណ្តាលសហរដ្ឋអាមេរិក (CENTCOM) បាននិយាយ “កងកម្លាំងអាមេរិកបានធ្វើការវាយប្រហារការពារខ្លួននៅភាគខាងត្បូងប្រទេសអ៊ីរ៉ង់ ដើម្បីការពារទាហានពីការគំរាមកំហែងពីប្រទេសនោះ” ។
យោងតាមលោក Hawkins គោលដៅទាំងនោះរួមមាន “ឧបករណ៍បាញ់មីស៊ីល និងនាវាអ៊ីរ៉ង់ដែលកំពុងស្វែងរកការដាក់ពង្រាយមីន”។ អ្នកនាំពាក្យ CENTCOM បានបន្ថែមថា “យើងនឹងបន្តការពារកងកម្លាំងរបស់យើង ខណៈពេលដែលនៅតែរក្សាការអត់ធ្មត់ នៅពេលដែលបទឈប់បាញ់កំពុងមានប្រសិទ្ធភាព”។
ទីក្រុង Bandar Abbas ភាគខាងត្បូងប្រទេសអ៊ីរ៉ង់ ដែលជាទីតាំងមូលដ្ឋានទ័ពជើងទឹក និងទ័ពអាកាសដ៏សំខាន់មួយ មានទីតាំងស្ថិតនៅតាមបណ្តោយច្រកសមុទ្រ Hormuz។

សហរដ្ឋអាមេរិក និងអ៊ីរ៉ង់បានបាញ់ប្រហារគ្នាជាច្រើនដងក្នុងអំឡុងពេលឈប់បាញ់។ កាលពីដើមខែនេះ កងកម្លាំងសហរដ្ឋអាមេរិកបានវាយប្រហារមូលដ្ឋានយោធាអ៊ីរ៉ង់ដែលសង្ស័យថានៅពីក្រោយការវាយប្រហារដោយមីស៊ីល យន្តហោះគ្មានមនុស្សបើក និងទូកអត្តឃាតជាបន្តបន្ទាប់ ដោយកំណត់គោលដៅលើនាវាចម្បាំងអាមេរិកដែលឆ្លងកាត់ច្រកសមុទ្រ។
ការវាយប្រហារចុងក្រោយនេះកើតឡើង ខណៈដែលការចរចាបន្តឈានដល់កិច្ចព្រមព្រៀងមួយដើម្បីបញ្ចប់ជម្លោះ។ អ៊ីរ៉ង់និយាយថា ខ្លួនកំពុងបញ្ចប់ក្របខ័ណ្ឌ ១៤ ចំណុចសម្រាប់កិច្ចព្រមព្រៀងសន្តិភាព។
រដ្ឋមន្ត្រីការបរទេសអាមេរិក Marco Rubio បានប្រកាសថា កិច្ចព្រមព្រៀងមួយអាចសម្រេចបាននៅថ្ងៃទី ២៥ ខែឧសភា ប៉ុន្តែប្រធានាធិបតី Donald Trump បាននិយាយថា លោកបានណែនាំអ្នកចរចារបស់ទីក្រុងវ៉ាស៊ីនតោនកុំឱ្យប្រញាប់ប្រញាល់។
អ្នកនាំពាក្យក្រសួងការបរទេសអ៊ីរ៉ង់ Esmaeil Baqaei បាននិយាយនៅថ្ងៃដដែលនោះថា ទីក្រុងតេអេរ៉ង់ និងទីក្រុងវ៉ាស៊ីនតោនបានឈានដល់ការឯកភាពគ្នាលើបញ្ហាជាច្រើនក្នុងអំឡុងពេលចរចាទាក់ទងនឹងកិច្ចព្រមព្រៀងនេះ។ លោកបាននិយាយថា “ទោះជាយ៉ាងណាក៏ដោយ គ្មាននរណាម្នាក់អាចបញ្ជាក់បានថា នេះមានន័យថាភាគីទាំងពីរហៀបនឹងចុះហត្ថលេខាលើកិច្ចព្រមព្រៀងមួយ” ដោយចោទប្រកាន់សហរដ្ឋអាមេរិកថា “មិនស៊ីសង្វាក់គ្នា” និងផ្លាស់ប្តូរជំហររបស់ខ្លួនឥតឈប់ឈរ៕

រូប​ថត​: US ARMY