ខេត្តកំពង់ឆ្នាំង ៖មានការភ្ញាក់ផ្អើលមួយ ដោយសារគេប្រទះឃើញសាកសពបុរសម្នាក់ ហើមអណ្ដែតទឹកជាប់និងកំប្លោក នៅចំណុចទំនប់បារាំង ស្ថិតនៅភូមិផ្សារឆ្នាំង សង្កាត់ផ្សារឆ្នាំង ខេត្តកំពង់ឆ្នាំង ។ ហេតុការណ៍នេះ បានកើតឡើងនៅវេលាម៉ោង៣ និង២០នាទីរសៀលថ្ងៃទី២៧ ខែឧសភា ឆ្នាំ២០២៦ ។
យោងតាមរបាយការណ៍របស់សមត្ថកិច្ចនគរបាលមូលដ្ឋាន ដោយត្រូវតាមការបំភ្លឺរបស់សាក្សី និងការបំភ្លឺរបស់ ប្អូនបង្កើតរបស់សពខាងលើ ដែលមានឈ្មោះ សៀង ចាន់ណា អាយុ៣៩ឆ្នាំ បានបញ្ជាក់ថា ជនរងគ្រោះត្រូវជាបងទី២ ដែលបានបាត់បង់ជីវិតមានឈ្មោះ សៀង សុភាព អាយុ ៤៣ឆ្នាំ រស់នៅភូមិផ្សារឆ្នាំង សង្កាត់ផ្សារឆ្លាំង ក្រុងកំពង់ឆ្នាំង ។
ប្រភពបន្តថា បងរបស់គាត់ ចូលចិត្តផឹកស្រានៅលើទំនប់បារាំងជារៀងរាល់ថ្ងៃ ពេលខ្លះអង្គុយមើលគេបង់សំណាញ់លើខ្នងទំនប់ ។ កាលពីព្រឹកថ្ងៃទី២៦ ខែ ឧសភា បងរបស់គាត់មកអង្គុយផឹកស្រាលើទំនប់បារាំងដូចសព្វដង ប៉ុន្តែមិនបានឃើញត្រឡប់ទៅផ្ទះវិញទេ ។ លុះរសៀល គាត់មុខរកក៏មិនឃើញ ។ សាក្សី១រូបទៀតបំភ្លឺថា នៅវេលាម៉ោង២រសៀលថ្ងៃទី ២៦ខែ ឧសភា គាត់ឃើញជនរងគ្រោះអង្គុយមើលគេបង់សំណាញ់នៅលើទំនប់បារាំងដែរ ហើយក៏ជិះម៉ូតូចេញទៅ ។
ក្រោយការធ្វើកោសល្យវិច្ច័យរបស់សមត្ថកិច្ចនគរបាលសន្និដ្ឋានថា ជនរងគ្រោះបានស្លាប់ដោយសារលង់ទឹក និងបានប្រគល់សពជនរងគ្រោះទៅក្រុមគ្រួសារធ្វើ បុណ្យតាមប្រពៃណី៕
