សារព័ត៌មាន AFP បានដកសស្រង់ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ នៅថ្ងៃពុធ ទី១០ ខែមិថុនា ឆ្នាំ២០២៦ ថាមេដឹកនាំកូរ៉េខាងជើង និងចិនបានអនុម័ត ផែនការយុទ្ធសាស្ត្ររយៈពេលវែងមួយសម្រាប់ទំនាក់ទំនងទ្វេភាគី អំឡុងដំណើរទស្សនកិច្ចថ្មីៗនេះរបស់លោកប្រធានាធិបតី ស៊ី ជីនពីង ទៅកាន់ទីក្រុងព្យុងយ៉ាង។

លោក ស៊ី ជីនពីង បានធ្វើដំណើរទស្សនកិច្ចដ៏កម្រមួយទៅកាន់កូរ៉េខាងជើង កាលពីថ្ងៃចន្ទដើមសប្ដាហ៍កន្លងទៅនេះ បន្ទាប់ពីបានទទួលស្វាគមន៍ដំណើរទស្សនកិច្ច របស់បណ្ដាមេដឹកនាំពិភពលោកជាបន្តបន្ទាប់ក្នុងទីក្រុងប៉េកាំង ក្នុងនោះរួមមានទាំងលោកប្រធានាធិបតីអាមេរិក ដូណាល់ ត្រាំ និងប្រធានាធិបតីរុស្ស៉ី លោក វ្ល៉ាឌីមៀ ពូទីន។ KCNA ក្នុងសេចក្ដីរាយការណ៍មួយបាននិយាយថាសមមិត្តគីម ជុងអ៊ុន និងសមមត្តិស៊ី ជីនពីង បានបង្ហាញការពេញចិត្ត និងមនោសច្ចេតនាយ៉ាងស៊ីជម្រៅ ចំពោះការពិតដែលមេដឹកនាំទាំង២ បានឈានដល់ការអនុម័តផែនការយុទ្ធសាស្ត្រមួយរយៈពេលវែងសម្រាប់ការអភិវឌ្ឍទំនាក់ទំនងទ្វេភាគរវាងប្រទេសទាំង២។
តាម KCNA អំឡុងដំណើរទស្សនកិច្ចរយៈពេល២ថ្ងៃរបស់លោក ស៊ី ជីនពីង ចិន និងកូរ៉េខាងជើងក៏បានពង្រឹងឱ្យកាន់តែស៊ីជម្រៅបន្ថែមផងដែរមិត្តភាពបដិវត្តន៍ និងទំនាក់ទំនងជាសមមត្តិដ៏ជិតស្និទ្ធ ព្រមទាំងគូសបញ្ជាក់ឡើងវិញពីការប្ដេជ្ញាចិត្តយ៉ាងរឹងមាំក្នុងការអភិវឌ្ឍទំនាក់ទំនងមិត្តភាពជាប្រពៃណីចិន-កូរ៉េខាងជើង ឱ្យទៅជាគំរូមួយនៃទំនាក់ទំនងយុទ្ធសាស្ត្រ និងដ៏មានថាមពល។
គួរបញ្ជាក់ថា លោក គីម ជុងអ៊ុន ដែលប្រទេសរបស់លោកពឹងផ្អែកយ៉ាងខ្លាំងលើចិន បាន និងកំពុងពង្រឹងទំនាក់ទំនងកាន់តែជិតស្និទ្ធជាមួយរុស្ស៉ី ក្នុងពេលប៉ុន្មានឆ្នាំថ្មីៗនេះ ខណៈបន្តពង្រីកឃ្លាំងអាវុធនុយក្លេអ៊ែររបស់កូរ៉េខាងជើង។ លោក គីម បានជំរុញទំនាក់ទំនងជាមួយរុស្ស៉ីទៅជាសម្ព័ន្ធមិត្ត បន្ទាប់ពីរូបលោកបានសម្រេចបានបញ្ជូនកងទ័ពទៅជួយជាកម្លាំងដល់កងទ័ពរុស្ស៉ីក្នុងសង្រ្គាមប្រឆាំងអ៊ុយក្រែន។ ប៉ុន្តែ ចិនដែលជាសត្រូវភូមិសាស្ត្រនយោបាយរបស់សហរដ្ឋអាមេរិកនៅតែបន្តជាដៃគូពាណិជ្ជកម្មដ៏សំខាន់របស់កូរ៉េខាងជើង។
ដំណើរទស្សនកិច្ចរបស់លោក ស៊ី ជីនពីងផងដែរ កើតមានឡើងតែប៉ុន្មានសប្ដាហ៍ប៉ុណ្ណោះ បន្ទាប់ពីរូបលោកបានបើកកិច្ចប្រជុំជាមួយលោក ដូណាល់ ត្រាំ ក្នុងទីក្រុងប៉េកាំង ជាទីដែលសេតវិមានបានអះអាងថាមេដឹកនាំទាំង២ បានគូសបញ្ជាក់ពីគោលដៅរួមរបស់ខ្លួនដើម្បីរំសាយអាវុធនុយក្លេអ៊ែរកូរ៉េខាងជើងជារឿងមួយ ដែលគេមើលឃើញថាមិនអាចទៅរួច៕

រូបថត​:KCNA