ឡូសអាន់ជឺឡេស៖ ក្រុមជម្រើសជាតិ សហរដ្ឋអាមេរិក នឹងចាប់ផ្តើមយុទ្ធនាការ  FIFA World Cup 2026 ដោយជួបក្រុមអន់ជាងគេក្នុងពូលគឺ ប៉ារ៉ាហ្គាយ នៅថ្ងៃសុក្រ ខណៈលទ្ធផលណាមួយក្រៅពីជ័យជម្នះ អាចធ្វើឱ្យមានការព្រួយបារម្ភអំពីឱកាសរបស់ម្ចាស់ផ្ទះរួមមួយនេះ។

សហរដ្ឋអាមេរិក ដែលឈរនៅចំណាត់ថ្នាក់លេខ 17 ពិភពលោក គឺជាក្រុមមានចំណាត់ថ្នាក់ខ្ពស់ជាងគេក្នុងពូល D ខណៈប៉ារ៉ាហ្គាយឈរនៅលេខ 41 ក្នុងចំណោមក្រុមទាំង 48 ដែលចូលរួមប្រកួត និងជាក្រុមមានចំណាត់ថ្នាក់ទាបជាងគេក្នុងពូល ដែលមាន អូស្ត្រាលី និងទួរគី ផងដែរ។

ក្រុមអាមេរិកបានយកឈ្នះប៉ារ៉ាហ្គាយ 3 ប្រកួតជាប់ៗគ្នា រួមទាំងជ័យជម្នះ 2-1 ក្នុងការប្រកួតមិត្តភាពកាលពីខែវិច្ឆិកាឆ្នាំមុន។ ប្រវត្តិសាស្ត្រក៏បង្ហាញថា ក្រុមទាំងពីរបានជួបគ្នានៅ World Cup លើកដំបូងក្នុងឆ្នាំ 1930 ដែលពេលនោះអាមេរិកជាអ្នកទទួលជ័យជម្នះ។

ការប្រកួតនឹងធ្វើឡើងនៅកីឡាដ្ឋាន Los Angeles Stadium ក្នុងទីក្រុង Inglewood ដែលត្រូវបានរំពឹងថានឹងពោរពេញដោយអ្នកគាំទ្រ។ ក្រុមម្ចាស់ផ្ទះសង្ឃឹមថានឹងរកគ្រាប់បាល់បានឆាប់ៗ ដើម្បីបន្ធូរសម្ពាធ ដោយមានខ្សែប្រយុទ្ធគ្រោះថ្នាក់ដូចជា Christian Pulisic, Weston McKennie និង Folarin Balogun។

ខ្សែការពារជាចំណុចខ្សោយរបស់អាមេរិក

ទោះបីមានសមត្ថភាពវាយលុកល្អក៏ដោយ បញ្ហាធំបំផុតរបស់អាមេរិកនៅតែជាប្រព័ន្ធការពារ។ អ្នកចាំទីវ័យក្មេង Matt Freese អាចនឹងត្រូវធ្វើការធ្ងន់ ខណៈក្រុមនេះរក្សាសំណាញ់ទីមិនឱ្យរបូតបានតែមួយប្រកួតប៉ុណ្ណោះក្នុង 13 ប្រកួតចុងក្រោយ និងរបូតដល់ 11 គ្រាប់ក្នុង 4 ប្រកួតចុងក្រោយ។

ប៉ារ៉ាហ្គាយពឹងផ្អែកលើខ្សែការពាររឹងមាំ

ក្នុងនាមជាម្ចាស់ផ្ទះរួម អាមេរិកមិនចាំបាច់ឆ្លងកាត់វគ្គជម្រុះនោះទេ ខណៈប៉ារ៉ាហ្គាយត្រូវប្រជែងយ៉ាងស្វិតស្វាញក្នុងតំបន់អាមេរិកខាងត្បូង និងទទួលបានកៅអី World Cup ជាក្រុមចុងក្រោយក្នុងចំណោម 6 ក្រុមដែលបានឡើងដោយស្វ័យប្រវត្តិ។

ក្រុមរហស្សនាម “La Albirroja” កំពុងវិលត្រឡប់មកកាន់ World Cup ជាលើកដំបូងចាប់តាំងពីឆ្នាំ 2010 ពេលដែលពួកគេធ្លាក់ក្នុងវគ្គ 8 ក្រុមចុងក្រោយក្រោមថ្វីជើងក្រុមជើងឯកអេស្ប៉ាញ។

ប៉ារ៉ាហ្គាយមានទម្រង់លេងផ្ទុយពីអាមេរិក ដោយពឹងផ្អែកលើខ្សែការពាររឹងមាំ និងកម្លាំងរាងកាយដើម្បីទប់ស្កាត់ការវាយលុករបស់គូប្រកួត។ ទោះជាយ៉ាងណា ពួកគេមានបញ្ហាក្នុងការស៊ុតបញ្ចូលទី ដោយរកបានត្រឹម 14 គ្រាប់ប៉ុណ្ណោះក្នុង 18 ប្រកួតជម្រុះ World Cup។

លើសពីនេះ ប៉ារ៉ាហ្គាយនឹងអវត្តមានខ្សែប្រយុទ្ធសំខាន់ Julio Enciso ដែលមានបញ្ហារបួសភ្លៅ និងមិនអាចចូលលេងប្រកួតបើកឆាកបាន។

ជំនួសវិញ ក្រុមនេះនឹងពឹងផ្អែកលើខ្សែបម្រើ Diego Gómez ដើម្បីបង្កើតឱកាស និងស៊ុតពីចម្ងាយ ខណៈពួកគេសង្ឃឹមថាកីឡាករវ័យ 23 ឆ្នាំរូបនេះ បានជាសះស្បើយពេញលេញពីរបួសជង្គង់ដែលបានកើតឡើងកាលពីខែមេសា។

ជ័យជម្នះនឹងផ្តល់ទំនុកចិត្តដល់ម្ចាស់ផ្ទះ

អតីតកីឡាករអាមេរិក Cobi Jones ដែលធ្លាប់ចូលរួម World Cup ចំនួន 3 លើក បាននិយាយថា ទោះបីជាការឈ្នះមិនមែនជារឿងសម្រេចជោគវាសនាទាំងស្រុងក្នុងការប្រកួតដែលមាន 48 ក្រុម និងកាត់ចេញត្រឹម 16 ក្រុមនៅវគ្គចែកពូលក៏ដោយ ក៏វាមានសារៈសំខាន់ខ្លាំងក្នុងការកសាងទំនុកចិត្ត។

លោកបានប្រាប់ Reuters ថា៖

«នោះគឺជារបៀបដែលអ្នកចង់ចាប់ផ្តើមការប្រកួត។ វាមិនមែនជាអ្វីដែលសម្រេចគ្រប់យ៉ាងទាំងអស់នោះទេ ប៉ុន្តែការទទួលបាន 3 ពិន្ទុតាំងពីដើម នឹងជួយបង្កើនឱកាសឡើងវគ្គបន្ទាប់ និងបញ្ជាក់ថាអ្នកគឺជាក្រុមដឹកនាំក្នុងពូល»។

ជាមួយនឹងការគាំទ្រពីអ្នកគាំទ្ររាប់ម៉ឺននាក់ និងសម្ពាធក្នុងនាមជាម្ចាស់ផ្ទះ សហរដ្ឋអាមេរិកនឹងព្យាយាមចាប់ផ្តើមដំណើររបស់ខ្លួនក្នុង World Cup 2026 ដោយទទួលបានជ័យជម្នះដ៏សំខាន់លើប៉ារ៉ាហ្គាយ៕