ក្រុមជម្រើសជាតិអាមេរិកបានចាប់ផ្តើមយុទ្ធនាការ FIFA World Cup 2026 របស់ខ្លួនយ៉ាងអស្ចារ្យ ក្រោយយកឈ្នះក្រុមជម្រើសជាតិប៉ារ៉ាហ្គាយក្នុងលទ្ធផល ៤-១ នៅទីក្រុង Los Angeles សហរដ្ឋអាមេរិក។

ខ្សែប្រយុទ្ធ Folarin Balogun បានក្លាយជាតួឯកក្នុងការប្រកួតនេះ ដោយរកបាន ២ គ្រាប់ក្នុងតង់ទីមួយ ជួយឱ្យក្រុមម្ចាស់ផ្ទះទទួលបានជ័យជម្នះដ៏ធំ និងចាប់ផ្តើមពូល D បានយ៉ាងល្អឥតខ្ចោះ។

អាមេរិកបានបើកការនាំមុខតាំងពីនាទីទី ៧ បន្ទាប់ពី Christian Pulisic បង្ហាញបច្ចេកទេសយ៉ាងល្អ ដោយអូសបាល់ឆ្លងកាត់ខ្សែការពារពីររូប មុនបញ្ជូនបាល់ឱ្យ Weston McKennie។ ការបញ្ជូនបាល់ចូលតំបន់គ្រោះថ្នាក់របស់ McKennie ត្រូវបាន Damian Bobadilla ភ្លាត់ស្នៀតទាត់ចូលទីខ្លួនឯង ធ្វើឱ្យអាមេរិកនាំមុខ ១-០។

បន្ទាប់ពីការសម្រាកក្នុងតង់ទីមួយ Pulisic បានបន្តបង្ហាញទម្រង់លេងដ៏ល្អ ដោយអូសបាល់ឡើងតាមស្លាបឆ្វេង និងបញ្ជូនបាល់យ៉ាងច្បាស់ទៅឱ្យ Balogun ដែលបានបញ្ចប់ទីយ៉ាងល្អ យកឈ្នះអ្នកចាំទី Orlando Gill ដើម្បីបង្កើនការនាំមុខដល់ ២-០។

Balogun បានរកគ្រាប់បាល់ទីពីររបស់ខ្លួននៅចុងតង់ទីមួយ បន្ទាប់ពីទទួលបាល់វែងពីមិត្តរួមក្រុម រួចអូសបាល់គេចផុតពីខ្សែការពារជាច្រើននាក់ មុនស៊ុតជើងឆ្វេងយ៉ាងខ្លាំងចូលជ្រុងលើនៃសំណាញ់ទី ធ្វើឱ្យអាមេរិកនាំមុខ ៣-០ មុនចប់តង់ទីមួយ។

ការប្រកួតបានបង្កការភ្ញាក់ផ្អើលនៅពេល Pulisic ត្រូវបានប្តូរចេញភ្លាមៗនៅដើមតង់ទីពីរ ខណៈក្រុមការងាររបស់ក្រុមជម្រើសជាតិអាមេរិកបានឱ្យដឹងថា គ្រូបង្វឹក Mauricio Pochettino នឹងបកស្រាយអំពីការសម្រេចចិត្តនេះក្រោយការប្រកួត។

ប៉ារ៉ាហ្គាយបានត្រឡប់មកវិញជាមួយការវាយលុកខ្លាំងជាងមុនក្នុងតង់ទីពីរ និងអាចរកបានមួយគ្រាប់នៅនាទីទី ៧៣ តាមរយៈកីឡាករបម្រុង Mauricio ដែលបានឆ្លៀតឱកាសពីកំហុសក្នុងប្រព័ន្ធការពាររបស់អាមេរិក។

ទោះជាយ៉ាងណា ក្រុមម្ចាស់ផ្ទះនៅតែគ្រប់គ្រងការប្រកួតបានយ៉ាងល្អ ហើយនៅចុងម៉ោង Gio Reyna បានបន្ថែមគ្រាប់បាល់ទី ៤ ដោយស៊ុតបាល់ពីក្រៅប្រអប់គ្រោះថ្នាក់ជាមួយជើងស្តាំ ធ្វើឱ្យអាមេរិកទទួលជ័យជម្នះ ៤-១។

ជ័យជម្នះនេះបានផ្តល់ការចាប់ផ្តើមដ៏ល្អសម្រាប់ក្រុមជម្រើសជាតិអាមេរិកក្នុងនាមជាម្ចាស់ផ្ទះ World Cup 2026 និងបង្កើនទំនុកចិត្តមុនការប្រកួតបន្ទាប់នៅក្នុងពូល D៕