ខេត្តកំពង់ស្ពឺ៖ លោក ជា វុទ្ធី អគ្គលេខាធិការ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (ក.អ.ក./គ.វ.ក.) នាព្រឹកថ្ងៃអង្គារ ទី៣០ ខែមិថុនា ឆ្នាំ២០២៦នេះ បានដឹកនាំគណៈកម្មការអន្តរក្រសួង-ស្ថាប័ន ចុះពិនិត្យស្ថានភាពជាក់ស្តែង និងវឌ្ឍនភាពនៃការអនុវត្តគម្រោងវិនិយោគរបស់ក្រុមហ៊ុន SUNDANCE INDUSTRIES CO., LTD. ដែលមានទីតាំងស្ថិតក្នុងភូមិទំពាម ឃុំតាំងក្រូច ស្រុកសំរោងទង ខេត្តកំពង់ស្ពឺ។
យោងតាមក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា ក្នុងដំណើរចុះពិនិត្យនេះ មានការចូលរួមពីតំណាងក្រសួង-ស្ថាប័នពាក់ព័ន្ធ និងអាជ្ញាធរដែនដី ដើម្បីពិនិត្យលើវឌ្ឍនភាពនៃការអនុវត្តគម្រោង រួមទាំងស្វែងយល់ពីបញ្ហាប្រឈមនានាដែលក្រុមហ៊ុនជួបប្រទះ ដើម្បីជួយសម្រួលដល់ដំណើរការវិនិយោគឱ្យកាន់តែមានប្រសិទ្ធភាព។ គួរបញ្ជាក់ថា ក្រុមហ៊ុន SUNDANCE INDUSTRIES CO., LTD. បានទទួលការអនុញ្ញាតវិនិយោគពីក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១ ខែមេសា ឆ្នាំ២០២០។ គម្រោងនេះផ្តោតលើការផលិតសំបកកង់យានយន្ត យ៉ាន់ គ្រឿងបង្គំយ៉ាន់ និងការផ្គុំដំឡើងកង់រថយន្ត។
បច្ចុប្បន្ន ក្រុមហ៊ុនបានបើកដំណើរការផលិតកម្មយ៉ាងសកម្ម ដោយបានបង្កើតការងារជូនប្រជាពលរដ្ឋក្នុងមូលដ្ឋានបានជាង ១០០កន្លែង។ ក្នុងជំហានដំបូងនេះ ក្រុមហ៊ុនកំពុងផ្តោតលើការផលិតសំបកកង់រថយន្តដឹកទំនិញ និងសំបកកង់រ៉ឺម៉កសណ្តោង ដោយមានសមត្ថភាពផលិតប្រមាណ ៦២.៥០០សំបកក្នុងមួយខែ ដើម្បីផ្គត់ផ្គង់ទីផ្សារនាំចេញទៅកាន់បរទេស៕
ដោយ៖តារា
