ខេត្តកំពង់ចាម÷សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី៧ ខែកក្កដា ឆ្នាំ២០២៦នេះ នឹងអញ្ជើញសម្ពោធបើកឱ្យប្រើប្រាស់ជាផ្លូវការ កំណាត់ផ្លូវជាតិលេខ៧ ប្រវែង ៤៥,៤៨៩ គីឡូម៉ែត្រ ចាប់ពី រង្វង់មូលស្គន់ ស្រុកជើងព្រៃ ដល់រង្វង់មូលគល់ស្ពានគីហ្សូណា ក្រុងកំពង់ចាម។

 

គួរបញ្ជាក់ថា គម្រោងពង្រីក និងលើកកម្រិតគុណភាពផ្លូវជាតិលេខ ៧ ពីស្គន់ ទៅកាន់ក្រុងកំពង់ចាម កំពុងដើរតួនាទី យ៉ាង សំខាន់ក្នុង ការឆ្លើយតបទៅនឹងលំហូរចរាចរណ៍ និងកំណើនសេដ្ឋកិច្ច។ បើតាម ក្រសួង សាធារណការ និងដឹកជញ្ជូន បានឱ្យដឹងថា ផ្លូវមួយខ្សែនេះមាន ការកើនឡើងនូវទំហំចរាចរណ៍ និងការដឹកជញ្ជូនយ៉ាងគំហុកនាពេល បច្ចុប្បន្ន។

 

យោងតាមរបាយការណ៍បច្ចេកទេសគម្រោងពង្រីក និងលើកកម្រិត គុណភាពកំណាត់ផ្លូវជាតិលេខ៧នេះ ដែលមានប្រវែង ប្រមាណ ជាង ៤៥ គីឡូម៉ែត្រ ចាប់ពីរង្វង់មូលស្គន់ ទីរួមស្រុកជើងព្រៃ ទៅដល់រង្វង់ មូលគល់ស្ពានគីហ្សូណា ក្រុងកំពង់ចាម ត្រូវបានស្ថាបនាជា ប្រភេទផ្លូវ ក្រាលបេតុងកៅស៊ូ(AC) កម្រាស់ ៩សង់ទីម៉ែត្រ និងពង្រីកទទឹងតួផ្លូវពី ២គន្លង ទៅ ៤គន្លង ដោយគន្លងនីមួយៗមានប្រវែង ៣,៧៥ម៉ែត្រ និងសួនពុះទ្រូងផ្លូវ ១,៥ម៉ែត្រ។

 

គម្រោងនេះរួមបញ្ចូលនូវការសាងសង់ស្ពានថ្មីចំនួន ១កន្លែង ប្រវែង ៤០ម៉ែត្រ មានទទឹង ២៤ម៉ែត្រ ស្ពានថ្មីចំនួន ៦កន្លែង ផ្សេងទៀត ប្រវែងសរុប ១០៦ម៉ែត្រ មានទទឹង ១២ម៉ែត្រ និងពង្រីកបន្ថែម ស្ពាន ចាស់ដែលមានស្រាប់ចំនួន ១កន្លែង ទទឹង ១០,៥ម៉ែត្រ, ដាក់លូ គ្រប់ប្រភេទចំនួន ៣៣០កន្លែង ,បំពាក់កាមេរ៉ាត្រួតពិនិត្យ ល្បឿន រថយន្ត ២កន្លែង បំពាក់ស្ថានីយ ជញ្ជីង ថ្លឹងរថយន្តដឹកជញ្ជូន លើសទម្ងន់កម្រិតកំណត់វៃឆ្លាត និងត្រួតពិនិត្យដោយស្វ័យប្រវត្តិ (AI and Weigh-in-Motion) ចំនួន ២កន្លែង និងបំពាក់ស្លាកសញ្ញា ចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាព ទៅតាមបទដ្ឋានបច្ចេក ទេសផ្លូវថ្នល់។

 

គម្រោងនេះអនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេសដោយ ក្រុមហ៊ុន ទីប្រឹក្សាបច្ចេកទេសក្វាងចូវវ៉ានអាន ប្រើប្រាស់រយៈពេលសាង សង់ចំនួន ៤០ខែ ហើយគ្រោងដាក់ឱ្យប្រើប្រាស់នៅក្នុងឆ្នាំ២០២៦ ដោយចំណាយថវិកាសរុបប្រមាណជាង ១១៧ លានដុល្លារអាម៉េរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋ ប្រជាមានិត ចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការ ដោះស្រាយផលប៉ះពាល់ ការបោសសម្អាត គ្រាប់មីន យុទ្ធភ័ណ្ឌមិនទាន់ ផ្ទុះ និងពន្ធអាករផ្សេងៗ៕

ដោយ៖ សុរិយា