ខេត្តកំពង់ស្ពឺ៖ មន្ត្រីនគរបាលខេត្តកំពង់ស្ពឺបានឲ្យដឹងនៅព្រឹកថ្ងៃទី១៦ ខែកក្កដានេះថា ដោយបានការបញ្ជាដឹកនាំពីលោកឧត្តមសេនីយ៍ទោ ឃឹម សុកខៃ ស្នងការ នគរបាលខេត្ដកំពង់ស្ពឺ និងការដឹកនាំពីលោកស្រី ឧត្ដមសេនីយ៍ត្រី ងិន សុគន្ធា ស្នងការរង ទទួលផែនការងារប្រឆាំងការជួញដូរមនុស្ស និងការពារអនីតិជន នៅរសៀលថ្ងៃពុធ ថៃ្ងទី១៥ ខែកក្កដា ឆ្នាំ២០២៦ កម្លាំងជំនាញដឹកនាំដោយលោកស្រីវរសេនីយ៍ឯក មួន មល្លិកា នាយការិយាល័យ ប្រឆាំងការជួញដូរមនុស្សនិងការពារអនីតិជន និងបានការសម្របសម្រួលនីតិវិធីពីលោកស្រី ធាម ច័ន្ទពីលីការ ព្រះរាជអាជ្ញារងអមសាលាដំបូងខេត្តកំពង់ស្ពឺ បានចុះដល់ទីតាំងអាហារដ្ឋានយីហោម្លប់លាភត្រជាក់ចិត្ត និងផ្ទះសំណាក់យីហោ ហេងហេង ស្ថិតនៅភូមិទឹកលង២ ឃុំរុងរឿង ស្រុកថ្ពង ខេត្តកំពង់ស្ពឺ សង្ស័យលួចឱ្យមានការប្រព្រឹត្តអំពេីសញ្ចារកម្ម និងផ្តល់ទីតាំងធ្វេីពេស្យាចារ។
លោកស្រី នាយការិយាល័យបានបញ្ជាក់ក្នុងប្រតិបត្ដិការខាងលេី កម្លាំងបានរកឃេីញបន្ទប់សម្រាប់ការស្នាក់នៅ និងបានឃាត់ខ្លួនម្ចាស់ទីតាំងម្នាក់ឈ្មោះ សុខុម សៀប ភេទស្រី អាយុ៦០ឆ្នាំ និងបានអន្ដរាគមន៍ជួយសង្គ្រោះនារីដែលបានមករកការធ្វេីនៅទីតាំងខាងលេី ៧ នាក់ ក្នុងនោះរកឃេីញនារីជាអនីតិជន២នាក់ដែលបានមកបម្រេីការដោយការអូសទាញនិងធានាពីម្ចាស់ហាង ។
បច្ចុប្បន្នសមត្ថកិច្ចបានធ្វេីការនាំនារីទាំង៧នាក់(អនីតិជន ២នាក់)និងម្ចាស់ហាងមកកាន់ស្នងការដ្ឋាននគរបាលខេត្ដ ដេីម្បីចំណាត់ការនីតិវិធីបន្ដ៕
ដោយ៖ សុរិយា
