ភ្នំពេញ÷ នៅថ្ងៃទី១៦ ខែកក្កដា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌសែនសុខ រួមជាមួយកម្លាំងនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ ដោយមានការដឹកនាំពី លោក ស៊ិត វណ្ណៈ ព្រះរាជអាជ្ញារងសាលាដំបូងរាជធានីភ្នំពេញ ចុះពិនិត្យទីតាំងសង្ស័យចំនួន០២ទីតាំង មានដូចខាងក្រោម :
ទីតាំងទី០១ : ផ្ទះល្វែងលេខ G-13 ផ្លូវហ្គូដឌី ក្នុងបរិវេនផ្សាររតនាផ្លាហ្សា ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ ឃាត់ខ្លូនជនជាតិចិន០១នាក់ និងដកហូតវត្ថុតាង រួមមាន : ១- Keyboard ចំនួន០៨កេះ ,២- Mother board ចំនួន១៩កេះ , ៣- Network ចំនួន០២កេះ , ៤ -ទូរសព្ទ ចំនួន០៤កេះ , – ៥-កុំព្យូទ័រយួរដៃ ចំនួន០៥កេះ និង៦- Adapter all in one +Phone ចំនួន០៤កេះ ។
ទីតាំងទី០២: បុរីកាណាឌីយ៉ា ផ្ទះលេខ D21 ផ្លូវឌៀលណេស ភូមិទ្រុងមាន់ សង្កាត់អូរបែកក្អម ខណ្ឌសែនសុខ ឃាត់ខ្លួនជនជាតិចិន០២នាក់ និងដកហួតសម្ភារៈ រួមមាន : ១- ទូរសព្ទដៃ ចំនួន ១៧៤០គ្រឿង, ២ – computer all in one ចំនួន ១១គ្រឿង ,៣- ស៊ីមកាត , ៤- គ្រឿងបន្លាស់ទូរសព្ទ និង៥- រថយន្ត ព្រូស ពណ៌ស ០១គ្រឿង ។
តាមការកោសល្យវិច្ឆ័យរបស់មន្ត្រីជំនាញ នាយកដ្ឋានប្រឆាំងបទល្មើសបច្ចេកវិទ្យា ជាប់ពាក់ព័ន្ធសង្ស័យរក្សាទុក និងផ្គត់ផ្គង់ឧបករណ៍បម្រើអោយបទល្មើស online scams ជនជាតិចិន និងសម្ភារវត្ថុតាងខាងលើ ត្រូវបញ្ជូនទៅនាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការនគរបាលជាតិ៕
ដោយ៖ សុរិយា
