Kylian Mbappe បានក្លាយជាកីឡាករដំបូងគេក្នុងប្រវត្តិសាស្ត្រ ដែលឈ្នះពាន ស្បែកជើងមាស (Golden Boot) នៃការប្រកួតបាល់ទាត់ពិភពលោក (FIFA World Cup) ចំនួន ២ លើក បន្ទាប់ពី Lionel Messi មិនអាចបន្ថែមគ្រាប់បាល់របស់ខ្លួនបានក្នុងវគ្គផ្តាច់ព្រ័ត្រ កាលពីថ្ងៃអាទិត្យ (១៩ កក្កដា)។

ខ្សែប្រយុទ្ធ និងជាប្រធានក្រុមបារាំងរូបនេះ បញ្ចប់ការប្រកួតដោយស៊ុតបញ្ចូលទីបាន ១០ គ្រាប់ ឈរនៅកំពូលតារាងអ្នកស៊ុតបញ្ចូលទី ខណៈ Lionel Messi របស់អាហ្សង់ទីន បញ្ចប់ដោយមាន ៨ គ្រាប់។

ខ្សែប្រយុទ្ធ Real Madrid វ័យ ២៧ ឆ្នាំរូបនេះ ក៏ធ្លាប់ឈ្នះពាន Golden Boot ម្តងរួចមកហើយ នៅ World Cup 2022 ប្រទេសកាតារ ដោយស៊ុតបាន ៨ គ្រាប់ បើទោះបីជាបារាំងចាញ់អាហ្សង់ទីនក្នុងវគ្គផ្តាច់ព្រ័ត្រក៏ដោយ។

Mbappe ដែលបង្ហាញខ្លួនក្នុង World Cup លើកដំបូងនៅឆ្នាំ ២០១៨ បានស៊ុតបញ្ចូលទី ២ គ្រាប់ ក្នុងការប្រកួតដណ្តើមចំណាត់ថ្នាក់លេខ៣ ដែលអង់គ្លេសយកឈ្នះបារាំង ៦-៤។

បច្ចុប្បន្ន Mbappe បានក្លាយជាអ្នកស៊ុតបញ្ចូលទីច្រើនជាងគេក្នុងប្រវត្តិសាស្ត្រ FIFA World Cup ដោយមានសរុប ២២ គ្រាប់ ពីការប្រកួត World Cup ចំនួន ៣ លើក លើស Lionel Messi ដែលមាន ២១ គ្រាប់ បន្ទាប់ពី Messi មិនអាចរកគ្រាប់បាល់បានក្នុងការបរាជ័យ ០-១ ក្រោមថ្វីជើងអេស្ប៉ាញ នៅវគ្គផ្តាច់ព្រ័ត្រ។

កីឡាករស៊ុតបញ្ចូលទីច្រើនជាងគេក្នុងប្រវត្តិសាស្ត្រ FIFA World Cup
🇫🇷 Kylian Mbappé (បារាំង) – 22 គ្រាប់
🇦🇷 Lionel Messi (អាហ្សង់ទីន) – 21 គ្រាប់
🇩🇪 Miroslav Klose (អាល្លឺម៉ង់) – 16 គ្រាប់
🇧🇷 Ronaldo Nazário (ប្រេស៊ីល) – 15 គ្រាប់
🏴 Harry Kane (អង់គ្លេស) – 14 គ្រាប់
🇩🇪 Gerd Müller (អាល្លឺម៉ង់) – 14 គ្រាប់
🇫🇷 Just Fontaine (បារាំង) – 13 គ្រាប់
🇧🇷 Pelé (ប្រេស៊ីល) – 12 គ្រាប់
🇩🇪 Jürgen Klinsmann (អាល្លឺម៉ង់) – 11 គ្រាប់
🇭🇺 Sándor Kocsis (ហុងគ្រី) – 11 គ្រាប់
🇵🇹 Cristiano Ronaldo (ព័រទុយហ្គាល់) – 11 គ្រាប់៕