អេស្ប៉ាញវិលត្រឡប់ទៅកាន់ចំណាត់ថ្នាក់លេខ១ FIFA ខណៈម៉ារ៉ុកឡើងដល់ចំណាត់ថ្នាក់ខ្ពស់បំផុតក្នុងប្រវត្តិសាស្ត្រ

ចែករំលែក៖

ក្រុមជម្រើសជាតិ អេស្ប៉ាញ ដែលទើបឈ្នះជើងឯក FIFA World Cup 2026 បានវិលត្រឡប់ទៅកាន់ ចំណាត់ថ្នាក់លេខ១ ពិភពលោក ក្នុងតារាងចំណាត់ថ្នាក់បុរសរបស់ FIFA ដែលបានប្រកាសនៅថ្ងៃចន្ទ។

ក្រុមរបស់លោក Luis de la Fuente បានយកឈ្នះម្ចាស់ជើងឯកឆ្នាំ ២០២២ អាហ្សង់ទីន ក្នុងលទ្ធផល ១-០ បន្ទាប់ពីថែមម៉ោង កាលពីថ្ងៃអាទិត្យ ហើយបានឡើងទៅកាន់កំពូលតារាង FIFA ជាលើកដំបូង ចាប់តាំងពីខែមករាមក។

ជាមួយគ្នានេះ អាហ្សង់ទីន បានធ្លាក់ទៅលេខ២ បន្ទាប់ពីបញ្ចប់ការប្រកួតក្នុងនាមជាជើងឯករង។

ចំណែក បារាំង និង អង់គ្លេស នៅរក្សាចំណាត់ថ្នាក់លេខ៣ និងលេខ៤ ដដែល ទោះបីអង់គ្លេសយកឈ្នះបារាំងក្នុងការប្រកួតដណ្តើមចំណាត់ថ្នាក់លេខ៣ ក៏ដោយ។

ប្រេស៊ីល ឡើងមកលេខ៥ ខណៈ ម៉ារ៉ុក ឡើងដល់លេខ៦ ដែលជាចំណាត់ថ្នាក់ខ្ពស់បំផុតក្នុងប្រវត្តិសាស្ត្ររបស់ពួកគេ។

ព័រទុយហ្គាល់ ធ្លាក់ចុះពីរចំណាត់ថ្នាក់មកលេខ៧ បន្ទាប់ពីធ្លាក់ត្រឹមវគ្គ ១៦ ក្រុមចុងក្រោយ។

បែលហ្ស៊ិក ឡើងមកលេខ៨ ដោយប្ដូរទីតាំងជាមួយ ហូឡង់ ដែលធ្លាក់ទៅលេខ៩។

ម៉ិកស៊ិក ឡើង៤ចំណាត់ថ្នាក់ ចូលក្នុង កំពូលទាំង១០ខណៈ ន័រវេស គឺជាក្រុមដែលឡើងចំណាត់ថ្នាក់ច្រើនជាងគេ ដោយហក់ឡើង ១២ ចំណាត់ថ្នាក់ មកលេខ១៩ បន្ទាប់ពីឈានដល់វគ្គ ៨ ក្រុមចុងក្រោយ World Cup។

រីឯ អាល្លឺម៉ង់ បានធ្លាក់ចេញពីកំពូលទាំង១០ មកលេខ១២ ស្ថិតនៅពីមុខ ក្រូអាត មួយចំណាត់ថ្នាក់ ខណៈ អ៊ីតាលី ដែលមិនអាចឡើងលេង World Cup បាន ធ្លាក់ទៅលេខ១៥។

ទុយនេស៊ី គឺជាក្រុមដែលធ្លាក់ចំណាត់ថ្នាក់ច្រើនជាងគេ ដោយធ្លាក់ ១២ ចំណាត់ថ្នាក់ មកលេខ៥៧។

ចំណែក អេហ្ស៊ីប ឡើង៥ចំណាត់ថ្នាក់ មកលេខ២៤ ហើយ ប៉ារ៉ាហ្គាយ ឡើង៧ចំណាត់ថ្នាក់ មកលេខ៣៤ បន្ទាប់ពីឈានដល់វគ្គ ១៦ ក្រុមចុងក្រោយ។