ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ និងជាប្រធានសមាគមក្រុមគ្រូពេទ្យស្ម័គ្រចិត្ត ស សុខា ព្រមទាំងលោកជំទាវ កែ សួនសុភី ស សុខា បានបានសម្តែងនូវ កាកោតសរសើរយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ក្រុមគ្រូពេទ្យស្ម័គ្រចិត្តជិត៤០០នាក់ដែលបាននិងកំពុងបន្តបេសកកម្មចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ។ ការថ្លែងនេះ បានធ្វើឡើងក្នុងឱកាសដែល ឯកឧត្តមអភិសន្តិបណ្ឌិត និងលោកជំទាវ បានអញ្ជើញជាអធិបតី នៃពិធីពិនិត្យ និងព្យាបាលជំងឺ ដោយឥតគិតថ្លៃជូនប្រជាពលរដ្ឋ នៅស្រុកស្វាយអន្ទរ ខេត្តព្រៃវែង នាព្រឹកថ្ងៃទី២៦ ខែកក្កដា ឆ្នាំ២០២៦នេះ។
ឯកឧត្តមអភិសន្តិបណ្ឌិត បានមានប្រសាសន៍ថា តាំងពីមានការកកើតនៃក្រុមគ្រូពេទ្យស្ម័គ្រ ស សុខា មកក្រុមគ្រូពេទ្យបានព្យាបាលជំងឺជូនប្រជាពលរដ្ឋដោយឥតគិតថ្លៃជាង៥៣ម៉ឺននាក់។ ឯកឧត្តមបានគូសបញ្ជាក់ថា សមិទ្ធផលទាំងនេះមិនអាចសម្រេចទៅបានឡើយ ប្រសិនបើគ្មានការចូលរួមពីអភិបាលនៃគណៈអភិបាលខេត្តព្រៃវែង គណៈបញ្ជាការឯកភាព ប្រធានមន្ទីរពេទ្យ ជាពិសេស “កងទ័ពអាវស” ដែលបានលះបង់កម្លាំងកាយចិត្តចូលរួមដោយស្ម័គ្រចិត្ត មិនគិតកម្រៃ។ សកម្មភាពទាំងនេះ គឺជាការលះបង់ដ៏មានសារសំខាន់ដើម្បីផលប្រយោជន៍ជាតិ និងសង្គម ជាពិសេសគឺការលើកស្ទួយសុខភាព និងសុខុមាលភាពរបស់ប្រជាពលរដ្ឋ។
លោកវេជ្ជបណ្ឌិត សេង បញ្ញាឫទ្ធិ ប្រធានមន្ទីរសុខាភិបាលនៃរដ្ឋបាលខេត្តព្រៃវែង បានឱ្យដឹងថា ក្រុមការងារ និងក្រុមគ្រូពេទ្យស្ម័គ្រចិត្ត ស សុខា ដែលបានចុះពិនិត្យ និងព្យាបាលជំងឺ ដោយឥតគិតថ្លៃ ជូនពលរដ្ឋ នៅស្រុកស្វាយអន្ទរ ព្រឹកនេះ មានចំនួន៣៨០នាក់។ ក្រុមគ្រូពេទ្យនឹងពិនិត្យនិងព្យាបាលជំងឺទូទៅ រួមមាន អប់រំសុខភាព ជំងឺផ្លូវចិត្ត ជំងឺកុមារ ជំងឺរោគស្ត្រី ជំងឺឫសដូងបាត ជំងឺសួត ជំងឺក្រពះ ពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺសើស្បែក ជំងឺដង្កូវព្រូន ជំងឺស្លេកស្លាំង ជំងឺសន្លាក់ឆ្អឹងជំងឺ រលាកថ្លើម ជំងឺកាមរោគ ជំងឺគ្រុនចាញ់ ជំងឺគ្រុនឈាម ជំងឺភ្នែក និងវាស់ភ្នែក។ ក្រៅពីនេះ ក៏មានការពិនិត្យភ្នែក និងចែកវ៉ែនតា ការពិនិត្យ និងព្យាបាលសុខភាពមាត់ធ្មេញ ជំងឺទឹកនោមផ្អែម ជំងឺបេះដូង ជំងឺលើសឈាម ជំងឺត្រចៀក ច្រមុះ បំពង់ក ជំងឺតម្រងនោម ពិនិត្យអេកូសាស្ត្រ វាស់ចង្វាក់បេះដូង មន្ទីរពិសោធន៍ (វិភាគឈាម) វះកាត់តូច និងព្យាបាលរបួសជាដើម។
លោកប្រធានមន្ទីរសុខាភិបាល បានបន្ថែមថា ក្នុងឆមាសទី១ ឆ្នាំ២០២៦ ក្រុមគ្រូពេទ្យស្ម័គ្រចិត្តបានពិនិត្យ និងពិគ្រោះជំងឺសរុប៥៣៧.០១៦ករណី។ លើសពីនេះ កាលពីឆ្នាំ២០២៥ មន្ទីរសុខាភិបាលខេត្តក៏បានបញ្ជូនមណ្ឌលសុខភាពចំនួន២ ចូលរួមប្រឡងប្រណាំងអង្គភាពផ្តល់សេវាសាធារណៈគំរូថ្នាក់ជាតិទូទាំងប្រទេស ជាលទ្ធផលនៅថ្ងៃទី២៩ ខែមិថុនា ឆ្នាំ២០២៦ កន្លងទៅ មណ្ឌលសុខភាពព្រៃព្នៅ ស្ថិតក្នុងស្រុកប្រតិបត្តិពារាំង ទទួលបានជ័យលាភីចំណាត់ថ្នាក់លេខ៣ ជាមណ្ឌលសុខភាពផ្តល់សេវាគំរូថ្នាក់ជាតិទូទាំងប្រទេស។
សូមរំលឹកផងដែរថា កន្លងមក ក្រុមគ្រូពេទ្យស្ម័គ្រចិត្ត ស សុខា បានចុះពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃចំនួន១៩លើក មាន១២ក្រុង ស្រុក គឺក្រុងព្រៃវែង ស្រុកពាមជរ ស្រុកស៊ីធរកណ្ដាល ស្រកពារាំង ស្រុកកំចាយមារ ស្រុកពាមរក៍ ស្រុកមេសាង ស្រុកព្រះស្ដាច ស្រុកកំពង់ត្របែក ស្រុកពោធិ៍រៀង និងស្រុកបាភ្នំ ដែលធ្វើការបានពិនិត្យ និងព្យាបាលជំងឺជូនពលរដ្ឋចំនួន៦៨.០៨៧នាក់ ស្ត្រី៤៣.៤១៥នាក់៕
