ប្រទេសបារាំង និងអេស្ប៉ាញ កំពុងប្រណាំងប្រជែងនឹងពេលវេលា ដើម្បីទប់ស្កាត់គ្រោះមហន្តរាយភ្លើងឆេះព្រៃដ៏អាក្រក់បំផុត ដែលមនុស្សជាច្រើនចងចាំ មុនពេលរលកកំដៅខ្លាំងថ្មីត្រូវបានគេរំពឹងថានឹងវាយប្រហារអឺរ៉ុបខាងលិចនៅសប្តាហ៍នេះ។

ចាប់តាំងពីដើមឆ្នាំ 2026 ភ្លើងឆេះព្រៃបានឆេះដីចំនួន 150,000 ហិកតានៅក្នុងប្រទេសអេស្ប៉ាញ និង 115,000 ហិកតានៅក្នុងប្រទេសបារាំង ដោយបានឆក់យកជីវិតមនុស្សជាច្រើន បំផ្លាញទ្រព្យសម្បត្តិរាប់មិនអស់ និងបង្ខំឱ្យមនុស្សរាប់រយរាប់ពាន់នាក់ជម្លៀសចេញ។
ប្រធានាធិបតីបារាំង លោក Emmanuel Macron ទើបតែបានប្រកាសថា ភ្លើងឆេះព្រៃដ៏ធំមួយនៅក្នុងតំបន់ Landes ត្រូវបាន “ទប់ស្កាត់” ភាគច្រើន។ ទោះជាយ៉ាងណាក៏ដោយ ការយកចិត្តទុកដាក់ទាំងអស់ឥឡូវនេះផ្តោតលើ “ភ្លើងឆេះដ៏ធំ” មួយទៀតនៅជិតទីក្រុង Bordeaux។ ភ្លើងឆេះព្រៃដ៏ខ្លាំងក្លានេះថែមទាំងបង្កើតចរន្តខ្យល់ និងបាតុភូតពពកភ្លើងដ៏កម្រទៀតផង។
ក្នុងរយៈពេលត្រឹមតែប្រាំមួយថ្ងៃកន្លងមកនេះ ភ្លើងឆេះព្រៃដែលមិនអាចគ្រប់គ្រងបាននេះបានបំផ្លាញដីចំនួន 42,000 ហិកតា ដោយបង្ខំឱ្យមនុស្សចំនួន 220,000 នាក់ចាកចេញពីផ្ទះរបស់ពួកគេ និងបំផ្លាញផ្ទះចំនួន 240 ខ្នង។
ថ្លែងនៅឯមជ្ឈមណ្ឌលវិបត្តិទីក្រុង Bordeaux លោកប្រធានាធិបតី Macron បានព្រមានថា៖ “សប្តាហ៍ខាងមុខនេះនឹងមានការលំបាកខ្លាំងណាស់ ហើយយើងត្រូវតែតស៊ូ”។ លោកក៏បានសង្កត់ធ្ងន់ផងដែរថា គ្រោះមហន្តរាយនេះគឺជាផលវិបាកដោយផ្ទាល់នៃ «លក្ខខណ្ឌនៃការប្រែប្រួលអាកាសធាតុ»។

នៅប្រទេសអេស្ប៉ាញជិតខាង ភ្លើងឆេះព្រៃដែលគំរាមកំហែងដល់តំបន់ភាគខាងលិចនៃរដ្ឋធានីម៉ាឌ្រីដ បានបង្ខំឱ្យមនុស្ស 60,000 នាក់ត្រូវជម្លៀសចេញ។ រហូតមកដល់បច្ចុប្បន្ន អណ្តាតភ្លើងបានបំផ្លាញផ្ទៃដី 77,000 ហិកតា ដែលជាតំបន់ដែលមានទំហំស្ទើរតែស្មើនឹងទីក្រុងញូវយ៉ក៕

រូប​ថត​: AFP